Thla 3/4 ei chu stock sa kan nei - Supply Minister

Supply Minister K. Lalrinliana chuan intodelh rih lo mah ila ration-ah harsatna a awm lo tih sawiin, “Engemaw thut lo thleng mahse, thla 3/4 ei chu stock sa kan nei,” a ti.

MNF Party in nimin-a Aizawl Mizo Hnam Run-a Chhung Inkhawm an neih ah MNF Adviser leh Supply Minister K. Lalrinliana chuan MNF chu an that bik vang ni lovin, mipui leh Pathian miten an tawngtai chhuah a ni tih sawiin, Covid hri leng tur hre lawktu, ramri buai tur hre lawk tu, khawchhak lam unaute lo tlan thla tur hre sa, ran pulh lo thleng tur hre lawk sa Pathian in hun harsa leh khirh laia Zoram kaihruai turin Zoramthanga sawrkar a ruat thu a sawi.

Supply Minister chuan an sawrkar hlim khan Chief Minister hovin NFS, BPL/APL tan Ration-ah Zoram mipui tharchhuah ngei lei an tum thu sawiin, Mizoram hian thla khatah buhfai quintal nuai khat chuang an mamawh thin thu leh Mizo tharchhuah an lei kha quintal 23 lek a nih thu a sawi a, lei tur chu awm se Mizoram tharchhuah ngei lei an duh thu leh Mizo tharchhuah lei tur an hmuh khawp loh thu a sawi a. Rice Mills pawh Agriculture Minister hovin a bial chhung Leilet tamna hmunah an din tawh thu te, tih tham mipuiin an la thar lo chu pawi a tih thu sawiin, Champhai lam buhfai that thu leh a man to bik thu a tarlang a, “Intodelh rih lo mah ila, ration-ah harsatna a awm lo. Buhfai dinhmunah kan tharchhuah tlem ngaihtuahin, engemaw thut lo thleng mahse thla 3/4 ei chu stock sa kan nei,” a ti a ni.

ONGC leh IOL-ten Meidum-a Gas an lakchhuah chu hralh sum atan duhthusam chiah a la ni lo tih pawh Supply Minister chuan sawiin, a chhakah hralh tlak hmuh ngei inbeiseiin hmalakna a kal mek tih a sawi a. “Kan leihnuai hausakna haichhuak turin hma kan la mek a, State share pawh 50:50 turin kan nawr a, kan share hmuh chu engzat pawh nise kan thatpui hrim hrim ang,” a ti a. MNF sawrkar hma khan ni khat-ah Gas trip 15 vel kan dawn thin thu leh Union Petroleum Minister-ah nawrin nitin trip 23 kan dawn tak char char thu te, ni khat-a trip 7 pechhuak thei Gas Bottling plant kan neih hi tilian turin hma an lak mek thu te, Vairengte-a Oil Depot chu kan khamkhawp loh avangin Stock-na hmun tha zawk nei tura ruahmanna chak tak an kal pui mek thu leh Zuangtui Godown pawh Sairang thlangah FCI Godown lian zawk sak mekah an sawn tur thu a sawi bawk.

Fisheries Minister ni bawk K.Lalrinliana chuan Union Fisheries Minister a hmuh thu leh State chhunga Sangha kan tharchhuah te State danga chawkluhte aiin kan hralh tlawm theiloh chhan chu, Head-load a Sangha phurhchhuah a ngaih thin vang tih a sawi a. Heng harsatna sukiang tur hian DPR siama an thehluh tawh thu a sawi bawk.