Sawrkar chhawr Doctor Aizawl atanga sawnchhuah theih loh sawrkar in a neih pawi tih thu sawi

Mizo Zirlai Pawl (MZP) Hqrs. Kolasib chuan Sawrkar Doctor chhawrlai zingah mi thenkhat, Sawrkar in Aizawl atanga sawnchhuah theihloh a nei chu pawi an tih thu an sawi.

MZP Hqrs. Kolasib hian nimin khan thuchhuah siamin Mizoram Sawrkar in Kolasib District Hospital-a District Medical Superintendent (DMS) tur a ruat thar mi pali (4) laiin an theihloh hnuah Dr. Samuel Lalfakawma Fanai chu July 5, 2022 khan DMS atan a ruat leh niin ani hian he mawhphurhna hi a pawm nia an hriat thu leh lawmawm an tih thu an tarlang a. Mizo Doctor zawng zawng deuhthaw hi Tribal Quota atanga MBBS zir an nih thu tarlangin, Tribal Quota hauh vang hian Zirlai te ngat phei chu vuak leh kut tuar hnem ber an ni tih an tarlang a, “Kan mamawh veleh an sum hmuhna chauh an thlir leh si hi kan dem takzet a ni,” an ti a, “Zirlai ten hnam rilru pu a Quota kan hauh nat ang hian kan Mizo Doctor te leh MBBS zirtur dangte pawhin sum leh pai aia kan Mizo pui te mamawhna dah hmasa turin kan ngen a ni,” an ti.

MZP thuchhuah hian Sawrkar Doctor chhawrlai zingah mi thenkhat, Sawrkar in Aizawl atanga sawnchhuah theihloh a nei chu pawi an tih thu pawh tarlangin, “Heng mite hi Private Clinic nei, Sawrkar atanga hlawh la chunga an Private Clinic chhuahsan duh lo te an ni. An zinga pakhat phei chuan Kolasib a awm ai chuan a hna bansan duh zawk hial a a sawi hi a pawi kan ti a, mi rethei leh harsa zawk, thingtlang mite hmuhsitna ah kan ngai a ni,” an ti a, a duh ang ngei hi Sawrkar pawhin a tihpuitlin sak ngei an beisei thu pawh tarlangin, “Aizawl chhuahsan duhlo mi tlemte te hian kan Doctor tha tak tak, mahni hna a inpe tak tak, damlo te tan pawh a inseng zawk thin, mipuite fak rawn Doctor dangte hmai an ti bal a, an chungah hian Sawrkar in Action la ngei se kan duh,” an ti. MZP chuan Non Practising Allowance (NPA) la chung a Clinic nei, mahni Office hours chhungah thu zo lo leh hun hmang zo lo tam tak avang hian mi harsa leh rethei zawk te'n nasa takin kan tuar nia tarlangin, “Heng te a nih avang hian Clinic nei NPA la an awm a nih chuan Sawrkar in a rang thei ang ber a tihtawp sak turin kan ngen bawk a ni,” an ti a ni.