Nikum-a ASF vanga Vawk suat chhungkaw 2488 te hnenah zangnadawmna pek an ni

Nikum 2021 chhunga Mizoram-a Vawk pul hri African Swine Fever (ASF) leng darh zel tur venna tura AH&Vety Department-in Vawk an suat sakte tana zangnadawmna chu nimin khan semchhuah niin mi 2488 hnenah Rs 10,48,42,200/- chu an Bank Account kaltlaanga sem a ni.

Vety Polyclinic Hospital Conference Hall, Aizawl Khatla-a hemi puala hun hman ah AH & Vety Minister Dr. K. Beichhua chuan ASF dona kawnga hmalakna leh zangnadawmna (compensation) hmuh a nih theihna tura hmalakna a theitawp chhuahtute chungah lawmthu a sawi a, nikum March 21-a Lungsen khuaa Vawk thih dan rinhlelhawm report an dawn veleh rang takin an bawhzui nghal tih sawiin, amah ngei pawh March ni 8, 2021 khan Vety Doctor leh mithiamte nen Lungsen khua panin a riahchilh tih a sawi a, ASF darh zel tur khuahkhirh turin hma an lak nghal thu leh an rin aiin a lo darh zau hman hle tih sawiin, ASF hri kai hi 100% an thi tia sawi pawh a lo dik hle tih an tawnhriat thu a sawi bawk.

Vety Minister chuan ASF vanga vawk thi zawng zawngte zangna-dawmna pek an duh laiin sawrkar laipuiin inkaihruaina a lo neih sa ang baka kal a theih si loh avangin AH&Vety Department hriatpuina a Vawk suatte chauh zangnadawmna an pe thei tih a sawi a. Hemi atana sawrkar laipui leh State sawrkar sum thawh tur hi 50-50 a nih vangin mipuite manganna hriatpuia State sawrkarin a doletna tur sum petu Chief Minister chungah lawmthu a sawi bawk.

National Action Plan hnuaia ASF nuaibo (eradicate) na atana hmalakna lian tak dang chu Vawk suat hi a ni a, Infected Area chhunga Vawk zawng chu hri la kai lo pawh suat vek tur a ni a. Mizoram-ah pawh hei hi a theih ang chin chinah kalpui niin Vawk neitu te remtihna la hmasa vekin Vawk suat hi kalpui a ni a. Sawrkar chuan zangnadawmna pek dan tur kalphung sa niin Vawk kg 15 hnuai lam tan Rs. 2200; kg 15-40 tan Rs. 5800; kg 40-70 tan Rs. 8400; kg 70-100 tan Rs. 12000 leh kg 100 chunglam tan Rs. 15000 a ni a. Vawk chaw an lo dahkhawl pawh tihchhiat vek tur a nih avangin vawk chaw kg 1 zelah Rs. 22 ruahman a ni.

Nikum khan Mizoram District 7-ah Vawk hi suat a ni a, a vaiin chhungkaw 2488 te Vawk 12,568 chu suat niin zangnadawmna hi Rs. 10,48,42,200/- semchhuah a ni a, Aizawl District chu tuar nasa ber niin Vawk 4746 suat a ni a, Serchhip District-in dawtin Vawk 3072 suat an ni a, Mamit District-ah 3028 Lunglei District-ah 961, Hnahthial District-ah 425, Saitual District-ah 208 leh Siaha District-ah 128, a vaiin Vawk 12568 suat a ni a. Tuna ASF thawh hnihna a Vawk thi zat leh Vawk suat zatte chu chhinchhiah zel a nih thu he hunah hian tarlan a ni bawk.

Comments

Popular posts from this blog

Tukverh-a tlasual boral