PWD leh YMA Sub-Hqrs. hruaitu ten PMGSY sum hmanga Sialhau kawng siam mek an enfiah

PWD Serchhip Division-a hotute leh Serchhip Sub-Hqrs. YMA hruaitute chuan nimin khan PMGSY sum hmanga Tuikum lui atanga Sialhau kawng laih leh siam mek chu a hmunah tlawhin hnathawh an enfiah a, kawng chhuat siamthat ngai te chu Fur ruahtui tlak zawh veleh siamthat nise an ti.
PMGSY sum hmanga Sialhau khaw panna kawng laih mek hi Chhiahtlang leh Chhingchhip inkara Hmuntha kawng siam tawh-ah kal zelin Tuikum lui atanga Thentlang lam chu KL. Biaksailova, Aizawl chuan a thawk a, Thentlang atanga Sialhau lam chu Aizawla mi tho Biakchama hna a ni thung a, he hunah hian Sub-Hqrs. YMA hruaitute chuan he kawng siam mekah hian hnathawh zawh tawh anga ngaih zingah siamthat (repair) ngai a awm nia an hriat thu an sawi a, Fur ruahtui tlak zawh veleh kawng chhuat Alkatra luan that ngai te chu siamthat nise an duh thu leh kawngba sam ngai te chu August thla chawhma lam hian samfai zui nghal se an duh thu an sawi a, helai hmuna hnathawktute leh an aiawha lo duty te chuan tha taka hnathawh zui an tum thu an sawi a ni.

Nimin-a helai hmun tlawhna ah hian PWD Serchhip Division atangin Executive Engineer Zirsangliana leh SDO H. Lalnunpuia te telin, PWD hotute chuan helaia PMGSY hnathawh chu a chhe lutuk lo na in, tha taka enkawlzui a ngai nia an hriat thu an sawi a, PMGSY sum la pekchhuah loh Mizoram pumah cheng vbc. 120 vel a awm avanga Contractor hnathawh ah duh anga thil tih zung zung a harsat thu te an sawi lang bawk. Contractor te chu an tih tur an ti lo emaw, an hnathawh a chhe lutuk emaw a nih chuan nakin zelah pawh a hna thawk zui thei lova siam (terminate) theih an nih thu te an sawi a ni.

PMGSY sum hmanga Sialhau khaw kawng siam mek enfiahna ah hian Serchhip Sub-Hqrs. YMA te hi an President Kawlthuama hova kalin Office Bearers dangte leh Vigilance & Monitoring Committee leh Media & Documentation Committee hruaitute an tel bawk a, PWD hotute nen hianSialhau VCP Lalduhsanga In-ah thukhawmin, anmahni dawngsawngtu Sialhau leh Thentlang Branch YMA hruaitute nen an thil hmuh dan leh ngaih pawimawh te an sawiho a. Kawng siam zawh thuai aiin hna tha an mamawh thu te, hna thawh zo tha lova Contractor ten an hawsan mai an hlauhthawn thu te an sawilang bawk a ni.

Comments

Popular posts from this blog

Tukverh-a tlasual boral