Ni 2 chhunga kawng chhia siamthat hna thawh phut

Khawthlangtuipui Group YMA thukhawm chuan Lunglei leh Tlabung inkar kawngpui, NH. 302 siamtha turin ni hnih (2) chhung hun an bituk a, kawng  chhiat vanga nunna chan mi 2 te pawh zangnadawmna pe ngei turin an phut.

Nimin-a thuchhuah an siamah Khawthlangtuipui Group YMA chuan nimin zing dar 7:00 khan Khawthlangtuipui Group YMA leh Tlabung-a Zodin leh Chawnpui Branch YMA OB te chuan Lunglei - Tlabung NH. 302 kawng chhe lutuk chungchangah Emergency Joint Meeting neiin helai kawng lai mektu NHIDCL leh a hnuaia thawk te chu July ni 28-29, 2022 chhunga kawng chhelai siamtha tura an phut thu leh chumi chhunga an siamtha lo a nih chuan an bungrua leh an chungah engpawh thleng se mawh an phur loh tur thu an tarlang a. Kawng chhia vanga nunna chanta Lalmalsawma (driver), Lunglei Ramthar leh R. Lalthantluanga, Chhipphir khua te pawh zangnadawmna NHIDCL in pe ngei turin an phut thu pawh tarlangin, July 30, 2022 (Inrinni)-ah Khawthlangtuipui Group YMA hnuaia Branch hrang hrangte leh lirthei neitute 'hnatlang pui' neih an tum tih an thuchhuah ah chuan an tarlang bawk.

Thudawn danin, Lalmalsawma, Lunglei Ramthar hi buhfai phur, Truck khalhtu niin, kumin January ni 25 khan Lunglei - Tlabung kawngah chesualin a boral a, Lalthantluanga (71) Chhipphir chu hna tul buaipuia Tlabung a zin niin, niminpiah zing khan Tlabung atanga an khua pana a hawna kawngah an chuanna lirthei kawng chhia a tang nam tuma a chhuk hnuah chesual palhin, kawng thlangah a tla hlum a ni.

Comments

Popular posts from this blog

Tukverh-a tlasual boral