Karleh-ah I-Day Football khel dawn

Serchhip District Football Association (SDFA) buatsaih SDFA Division Screening/Independence Day Celebration Tournament chu tun thla ni 25 khian Serchhip-ah khelh tan tumin ruahmanna kalpui mek a ni.

SDFA in Season thar atana Tournament a buatsaih hmasak Division Screening, Independence Day Celebration Tournament ni bawk hi karleh Thawhtanni, July 25, 2022 atang khian Serchhip Sports Complex-ah khelh tan tum a ni a, he Tournament-a tel tur hian nizan thleng khan Entry Fee pek theih hun hi hawn niin he thu buatsaih lai hian 1st Division Club 8 te chuan tel turin Entry Fee an pe tawh a, 2nd Division atangin Team 15 in Entry Fee pe tawhin heng bakah hian Team dang pathum te pawh tel turin an inbuatsaih mek a, 2nd Division-ah hian Team 18 lai tel thei tura beisei an ni a, tunkar Zirtawpni zan khan Tie Draw neih a ni ang.

Tarlan tawh angin tun tum Tournament hi Division Screening a nih nghal dawn avangin Club hrang hrang tan a pawimawh viau dawn a, 1st Division-a awm mek Team 8 te hi Round Robin League hmanga inkhel tura ruahman niin Team hrang hrangte hi an intum kual theuh anga, chuta point hmu hniam ber te chu Season thar ah hian 2nd Division-ah an awm dawn a. 2nd Division-a awm te erawh Group League-a inkhelin Champion Team te chu Season thar-ah 1st Division-ah an kaisang dawn a, 1st Division-a hniam ber dawttu leh 2nd Division-a pahnihna ten 1st Division-a awm inchuhin Play-Off match an khel leh dawn bawk a ni.

SDFA hian tunah hian Player inziahluh hun an hawng mek a, Team khatah player 20 aia tlem lo ziahluh tur niin a tam lamah erawh bituk a awm lo thung a, kumdanga la tih ngai loh ruahmanna thar siam awmin District pawn lam player 3 aia tam Team khatah ziahluh theih a ni lo bawk a, Player inziahluh theih hun hi tun thla chhung hawn ni mah se karleh mai-a tan tur SDFA Division Screening/Independence Day Celebration Tournament erawh tunkar Inrinni zan dar 12:00 thlenga inziaklut tan chiah khelh theih a ni dawn thung a ni.