District tinah District Sports & Youth Office siam tum

/

Sports Minister Robert Romawia Royte chuan District tinah District Sports & Youth Office siam tuma hmalak mek a nih thu a sawi.

Sports & Youth Services changtu Minister Robert Romawia Royte hovin niminpiah khan District Sports Committee chungchang sawihona Online Meeting chu Sports Department leh Mizoram State Sports Council hotute bakah District tin atangin Deputy Commissioner te leh an aiawh ten an nei a, he hunah hian Sports Minister chuan District tinah District Sports & Youth Office siam tuma hmalak mek a nih thu tarlang hmasain, Mizoram Sawrkar-in thalaite hmakhua ngai taka ke a penna hi a hlawhtlin chhoh zel beiseina nen hmathlir duhawm tak a awm thu a sawi a. Mizoram Sports Policy 2019 tha tak duan chhuah a nih dan te leh infiammite hamthatna tura sawrkarin chak takin hma a lak mek dante a sawilang a ni.

He hunah hian Centrally Sponsored Scheme hrang hrang, PMJVK te, Khelo India Scheme te leh a dangte hmanga Mizorama Sports infrastructure-in hma a sawn dan te leh District tam zawkin PMJVK Scheme kaltlanga hmunhma tha an neih theih dan tur te sawilan a ni a. Heng bakah hian infiammite tana hamthatna, Incentive Cash Award leh The Mizoram Sports Award chungchang te pawh sawiho a ni bawk.

He thutkhawm ah hian Mizoram State Sports Council (MSSC) Secretary John Tanpuia hnen atangin District Sports Committee inrelbawl dan tur Powerpoint presentation ngaihthlak a ni a. District hrang hranga District Sports Committee kalpui a nih mek dan leh tuna Regulation thar, The Mizoram Sports Council (Formation and Functioning of District Sports Committee) Regulation 2022 nen a danglamna te inhrilhfiah a ni a, zawhna leh chhanna hun hman niin DC hrang hrangte atangin rawtna, zawhna leh chhanna te neih a ni bawk.

The Mizoram Sports Council (Formation and Functioning of District Sports Committee) Regulation 2022 ang hian District zawng zawngah District Sports Committee chu Deputy Commissioner te Chairman-na hnuaiah kalpui a ni tawh dawn a. Hei vang hian tuna District Sports Committee lo din tawh leh awm mek te pawh thiah a, dan thar anga inruat/inthlan thar a tul dawn avangin Sawrkar lam pawhin hemi chungchang ah hian thuchhuah mumal tak a siam tur thu te ngaihthlak a ni.

Thudawn danin District Sports Committee kalphung thar turah hian District tina Deputy Commissioner te chu Chairman niin District Sports & Youth Officer te chu Secretary an ni dawn a, Sr. Vice Chairman leh Vice Chairman bakah Asst. Secretary te chu District Sports Committee hnuaia Sports Association atanga thlan tur an ni dawn a, MSSC in Fin. Secretary ruatin Treasurer erawh an awm dawn lo a ni.

Comments

Post a Comment

Popular News (Last 30 Days)

SDVA in hruaitu tur thlang

/
Image
Serchhip District Volleyball Association (SD-VA) chuan nimin khan khan Serchhip Kawnpui VC Hall-ah kum 2024-2025 chhunga an Pawl hruaitu tur thlanna an nei a, President-ah K. Tlangthanmawia (Bazar Veng); Sr. Vice President-ah VL. Hruaitluanga (Bazar Veng); Vice President-ah H. Rohmingliana (Chhim Veng); General Secretary-ah Zothansanga (Chhim Veng); Joint Secretary-ah Jerry Lianhming-thanga (Vengchung) leh Zoramthara (Darnam Veng); Treasurer-ah C. Lalhruaitluangi (Chhiah-tlang Kawn Veng) leh Fin. Secretary-ah R. Lalhnehzauva (Vengchung) te thlan an ni.
Kimchang zawkin »

Truck 8-ah Kuhva ro man

/
Nimin zing dar 3:00 vel khan Mizoram Police te leh Central YMA Kumpuan Sub-Committee te chuan Seling daiah Myanmar atanga dan lova rawn lut ni a rin Kuhva ro Trip 8 leh Escort motor pahnih an man. Thudawn danin, Kuhva ro te hi Truck ke 10 nei Motor 8-ah phurh niin Truck vengtu, Escort Motor 2 man tel a ni a, lirthei leh a khalhtu mi 10 te chu manin Seling Police Outpost pek an ni a, heng Kuhva phur Motor te hi Champhai atanga rawn kalin Khawzawl Gate an rawn paltlang nia hriat a ni. Dan lova Kuhva ro a sumdawnna hi a rukin kalpui reng nia a lan avangin Central YMA leh Police te chuan theihtawp chhuahin hma an la zui mek zel a ni.
Kimchang zawkin »