Nakum-a MLA inthlanpui ah ZPM Under 10-ah; Congress Artelukawn thei an ni - MNF President

MNF President Zoramthanga chuan nakum-a Mizoram MLA inthlanpui neih turah ZPM chuan Seat 10 an lak phak a rin loh thu leh Congress chu an tihsual chuan Artelukawn thei an nih thu a sawi.
MNF Serchhip East Block buatsaiha nimin-a Vantlang Inkhawm Serchhip Auditorium-a neih ah MNF President Zoramthanga chuan ZPM chu kum 2018 inthlan hmaa an insawi dan leh inthlan hnua an awm dan a inang lo tih sawiin, “Kalphung thar daih rei lo ber an ni,” a ti a, “Inthlan a zo a, Party dang angin kalphung an rawn nei leh ta tho a, Unit an din a, Kohhran pawh Unit-ah an chhiar leh thei tawh si lo,” a ti a. Tun ang boruaka an kal zel chuan ZPM hian seat 10 an lâk phak a rin loh thu sawiin, an seat neih mek pawh an hum ang em tih ngaihtuah tham a nih thu a sawi a ni. MNF President chuan Congress Party chungchang pawh sawiin, Delhi chakna eng hmang nia sawiin, “Khulamah a burpui a tlu a, helam ah a phita a rawp ral zel mai a ni. An lenna ber thin Hmarchhak-ah an Phita a rawp ral zel a ni tih hretu te vek kan nih hi,” tiin nakum-a MLA inthlanpui lo awm turah Tlabung bial-ah an la tlin chuan a ziaawm tur thu leh Thorang bial pawh an bialtu MLA in a ngaihsak tawh lo niin a sawi a. “Congress in Seat 2/1 an la hram a nih chuan an vannei ah ka ngai, an tihsual chuan an Artelukawn thei a ni,” a ti.


MNF Serchhip East Block buatsaiha Vantlang Inkhawm hi an Block President C. Vanlalsiamthara chuan kaihruaiin he hunah hian MNF President Zoramthanga chuan Sawrkar lo tur buaipui buaipui hi Zoram Politics-ah a finthlak loh em em tih pawh sawiin, hei hi Serchhip mipuite pawh an hriat a rin thu leh Pathian leh mipuite zarah MNF chuan nakum-a inthlanpui ah Seat 30 tlin ngei an tum thu a sawi a. “MNF hi kan fel, kan tha, kan ropui kan tihna a ni lo, Pathian in kum 60 a enkawl, harsatna tinreng kara a lo chhawmchhuah tawh a ni,” tiin tunah chuan Zoram hruai tura Pathian in hun a pek a inherchhuak mek tih a sawi a. Serchhip bial chu Opposition bial a ni tih sawiin, an Party atangin han enkawltu tur an neih loh thu leh nakum-a inthlang tur kan nih avangin tun atanga buaipuia enkawltu tur bial in an mamawh tawh si avangin Elected OB te leh an hotuten ‘Serchhip bial lo enkawltu turin J. Malsawmzuala Vanchhawng dah ang u’ an tih angin an rawn pe tih a sawi a, nasa taka lo tangho turin a chah bawk.

He hunah hian J. Malsawmzuala pawhin MNF Party chu tobul nghet tak nei a nih thu leh Mizo hnam a awm chhung chuan MNF party hi a ding reng dawn tih sawiin, nakum 2023-ah MNF Party hian Tualto Party zingah elpui tham a nei dawn lo niin a sawi a. MNF kaihhruai sawrkar hmalakna hrang hrangte tarlangin, “Bial chhung mi ka nihna zawnah theihtawp chhuah ka inhuam a, in fuihna leh zilhna te, in thurawnte pawh ka dawng thei reng a ni,” a ti bawk.

Comments

Popular posts from this blog

Tukverh-a tlasual boral