COVID-19 hri kai thar la tlahniam thei tak tak lo

Mizoram-ah ni khat-a COVID-19 hri kai hmuhchhuah zat an la tlahniam thei meuh lova, niminpiah khan hri kai mi 145 hmuh belh leh an ni.

Niminpiah khan Mizoram-ah Sample 830 enfiah leh niin heng atang hian COVID-19 hri kai mi 145 te hi hmuh an ni a, Sample enfiah atanga chhutin za zela 17.47 te chuan hri hi an kai a ni. Heng hri kai hmuh zinga 144 te hi Rapid Antigen Test hmanga Sample enfiah atanga hri kai hmuh an ni a, Aizawl District-ah 64, Lunglei leh Mamit District-ah 23 ve ve, Kolasib leh Serchhip District-ah mi 8 ve ve, Champhai, Khawzawl leh Saitual District-ah mi 4 theuh, Siaha District-ah mi 3, Lawngtlai District-ah mi pahnih leh Hnahthial District-ah mi pakhat te an ni a, Lunglei District-a TrueNat Laboratory-ah Sample enfiah pakhat awmin hri kai mi pakhat hmuh a ni bawk a. ZMC-a RT-PCR Laboratory-ah Sample pahnih enfiah niin hri kai hmuh an awm lo thung.

Nimin khan Mizoram District 10 atangin COVID-19 hri kai enkawl dam mi 151 an awm ve leh a, heti hian nimin tlai thleng khan Mizoram-a COVID-19 hri kai hmuhchhuah chu 2,32,225 niin an zinga 2,30,752 te chu enkawl dam an ni tawh a, hri kai zinga za zela 99.36 te enkawl dam ni tawhin hri kai enkawllai 763 an la awm mek a, hri kai zingah mi pakhat boral leh mi 710 an boral ta bawk a ni.