Latest News

Kan sum harsat chhan - a hnar atangin kan hmu tha lo - Taxation Minister

Taxation Department changtu Minister Lalchamliana chuan kan sum harsat chhan chu a hnar atanga kan hmuh that loh vang niin a sawi.

MNF Aizawl South-II Block in Kulikawn YMA Hall-a 'Leadership Training leh Mi thar lawmluh' nimin-a an buatsaih a hmanpuina ah Lalchamliana chuan tunlai thil thleng sawiin, “Kan pu ber Pu Zoramthanga, Congress, ZPM, BJP ten an bei vak vak hi politic kalphung pangngai a ni. Hei hi eptu party-te tih dan tur a ni,” tiin an Party mipuite chu chiai lo turin a chah a. Finance chungchanga an beihna sawifiahin, “India ram-a chhiah tlingkhawm insem zai (share in taxes) atangin Mizoram chuan kum khatah 0.56% chauh kan chang ve a. Thla khatah cheng vbc. 230 vel a ni. Covid laiin cheng vbc. 180 vel min pe a. Grants pawh April 2020 atanga kum 2022 inkar, thla 20 vel chhunga kan hmuh tur hmuh loh chu cheng vbc. 2,600 zet a ni,” tiin, hetiang a nih vang hian sum harsatna a awm lo thei lo niin a sawi a. Sum hmuhna hlawm lian Revenue (deficit) Gap Grant, sum indaihlohna chu kum 5 zel atan Finance Commission atanga a lo kal thin thu leh FC 14-na (2016-20) chhung khan cheng vbc. 21,183 rawn pe in FC 15-na (2021-25) atan Mizoram chan tur chu cheng vbc. 6,544 chauh dah a ni tih a sawi bawk.

Lalchamliana chuan sum hmuhna dang,- CSS chu India ramah an kalpui tha tawk lo thin nia sawiin, “Tunah chuan RBI Account luahlum tura dah thin cheng vbc. 500-600 kha CSS atan pekchhuah a lo tul ta a. Tunhma pawhin kan nawmsak loh tehlul nen, tunah hian kan nuamsa lo zual a ni. CSS pawisa hi thil dangah hman phal a ni lova, kan account dinhmun luahlum turin dah thin a ni,” tiin “Kan sum harsat chhan hi a hnar atangin kan hmu tha lo a ni,” a ti a. CSS, MR/Provisional Employee etc. tel lovin sawrkar hnathawk hlawh atan thla tin cheng vbc. 400 vel pekchhuah a ngaih thu leh Congress sawrkar khan Sixth Pay atangin Seventh Pay an kalpui avangin hlawh atan senso a pun phah hle niin a sawi a. Kan sum dinhmun hi a ziaawm chho zel dawn nia Finance hotuten an hrilh thu sawiin, “SEDP pawh kan kalpui zel dawn,” a ti a. Chhungkaw 60,000 thlanchhuah atangin chhungkaw 30,000 hnenah Rs. 50,000 pek phawt tur a nih thu a sawi bawk a ni.

Comments

Popular News (Last 30 Days)