MLA leh CEM bakah mi 11 te thiamloh chantir an ni

Kum 2013-2014 chho vel Chakma Autonomous District Council (CADC) hnuaia Development Fund cheng nuai 137 chuang hman sual thubuaiah khatihlaia Chief Executive Member (CEM), tuna Tuichawng bialtu MLA nilai Dr. BD. Chakma leh CEM ni mek Buddha Lila Chakma te bakah mi 11 te chu Court of Special Judge-in thiam loh a chantir a, a hremna tur chu karleh Thawhtanni, July ni 25,2022-ah puan a ni ang.

Special Judge (Prevention of Corruption Act) Vanlalenmawia chuan nimin khan thuremna ti-chhuakin heta tarlan a nih danin, thiamloh chantir tak mi 13 te hian kum 2013-14 chho khan sawrkar laipui atanga hmasawnna hnathawhna tur sum lo kal, Development Fund Rs 137,10,147/- chu hlawh atan an lo hmang a, thubuai chhui lai hian rul leh vek mah se an chet dan hi dan kalh a nih avangin thiamloh chantir an ni.

Special Court, PC Act in thiamloh a chantir te hi khatihlaia CADC-a Chief Executive Member leh tuna BJP MLA Dr. BD. Chakma; CADC-a MNF sawrkara Chief Executive Member ni lai mek  Buddha Lila Chakma leh District Council-a Member ni lai 4 - Ajoy Kumar Chakma, Buban Kumar Chakma, Mohan Chakma leh Amit Kumar Chakma te an ni a. Anni bakah hian kum 2013-2014 chho vela Member of District Council (MDC) Amar Smriti Chakma, Adikanta Tongchangya, Parimal Chakma, Susen Chakma, Taranisen Chakma, Sushil Kumar Chakma leh Chitra Kumar Chakma te an ni.

Thudawn danin, kum 2018 khan khatih laia BJP Mizoram Pradesh-a General Secretary Vanlalhmuaka chuan CADC sum tih chengpen chungchangah hian Complaint hi a thehlut a, Anti-Corruption Bureau (ACB) Police Station-in kum 2018 vek khan thubuai hi ziahluh niin an chhui zui ta a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man