Bukpui ram-ah District Hospital sak tum niin Serchhip Venglai-a PWD Quarters sawnchhuah a ni dawn

Chief Minister Zoramthanga chuan nimin khan Serchhip rawn tlawhin Serchhip District Hospital luah mek leh Hospital building thar sakna tura rawt te chu tlawhin, Serchhip District Hospital building thar chu Bukpui-ah sak a nih dawn thu leh Staff Quarters leh thildang sak bultanna atan cheng vbc. 13 pek a nih tur thu a sawi.

Serchhip District Hospital thar sakna tura hmalakna kal meka Serchhip NGO Coordination Committee leh Town chhunga VC hrang hrang te Joint Meeting in Damdawi In Building thar sakna tura an ruahman Serchhip Bukpui ram hi nimin khan Chief Minister Zoramthanga chuan a hmunah tlawhin sawrkar Department hrang hrang hotute chuan ruahmanna an lo siam dan te an lo hrilh a. Hemi hnu hian Serchhip Bazar Veng-a Serchhip damdawi In awm mek pawh Chief Minister hian a hmunah tlawh leh bawkin damdawi In-a thawktute chuan helai hmuna damdawi In building thar sa tura ruahmanna an neih dan te an lo hrilh bawk a. Hemi hnu hian Chief Minister chuan damdawi In building thar hi Bukpui ram-ah sak a nih tur thu hi sawiin, damdawi In sakna tur bakah hian thawktute chenna tur leh thil dang mamawh sak bultanna atan Special Assistance atangin cheng vbc. 13 pek a nih dawn thu a sawi a, Damdawi In leh heng Quarters te hi a ruala bultan theih a nih dawn thu leh tuna Damdawi In building awm mek chu engmah tibuai lovin a kal pangngaia a kal reng dawn thu pawh a sawi bawk a ni.

Hemi hnua Serchhip Auditorium-a Vantlang Inkhawm neih ah Chief Minister hian Serchhip damdawi In sak tur chungchang hi sawi lehin, Damdawi In building thar sakna atan hian cheng vbc. 21 hmuh a nih tawh thu leh a sakna tur hmun chungchang ah ngaihdan chi hnih a awm thu a sawi a. Mipuite hlauhthawn, ‘Cheng Vbc. 21 senga Hospital saka a kentel Quarters leh thildang pawimawh sakna bultanna tur kan nei si lo anga, damdawi In hi a mal din anga a buaithlak ang’ tih avanga mipui rilru pawh a buai hle tih an hriat thu sawiin, Health Minister Dr. R. Lalthangliana hovin a tira pawimawh leh mamawh zual tur en tura an tih angin Department lamin vbc. 13 vel chuan bul tan thei tura an in ngaih thu a sawi a. Hei vang hian Finance Minister a nih angin sawrkar laipui in min pek, Special Assistance to State for Capital Investment (SASCI) atangin sum hi pek a nih tur thu a sawi a, Tender-a a thawktu tur thlangin an duhna ngeia bul tan thei turin an rawn chhawpchhuah sak tih a sawi a ni.

Nimin-a Bukpui ram a tlawhna ah hian Sawrkar Department hotute chuan Bukpui ram a damdawi In sa tura ruahmanna an siam dan te Chief Minister hi an lo hrilh a, damdawi In Building hi tunhma lama Bukpui M/S awm thinna zawl kil-a sak tura ruahman niin a chhak deuh-a mual pawng ah District Medical Superintendent awmna sak leh tura ruahman a ni bawk a, helai hmun panna kawng hi hmun hnih ah siam tura ruahman niin Bukpui lam leh Chhiahtlang lam atanga kal theih tura ruahmanna siam a ni.

Chief Minister hian nimin vek khan New Serchhip-a PWD Complex pawh tlawhin helai hmuna SDO Quarters sak dan tur a en a, tuna EE PWD Office bul-a ram awl chu SDO Quarters sakna atan remchang nia a hriat thu leh a chhawnga sak a nih chuan Staff dangte chenna tur pawh sak theih tura a ngaih thu sawiin, hemi tura ruahmanna siam turin thawktute chu a hrilh nghal bawk a ni.

Hemi hnu hian Serchhip Venglai-a PWD SDO Quarters awm mekna pawh Chief Minister hian tlawh nghalin helai hmuna Quarters hrang hrang aiawh tur sakna atan sawrkar in PWD-ah sum a pek dawn thu leh New Serchhip-a PWD Complex-ah sak a nih tur thu a sawi a. Helai hmun hi khawtlang in a mamawh ang zela hman tura pek a nih dawn thu pawh sawiin, Bazar Building, Motor Parking leh tuna YMA Information Building bakah Police Beat te pawh leng tura a ngaih thu a sawi a ni.