COVID-19 kai enkawllai mi 717 la awm mek

Nimin tlai thleng khan Mizoram-ah COVID-19 hri kai enkawllai mi 717 an la awm.

Niminpiah Pathianni khan Mizoram-ah Sample 63 enfiah awmin heng atang hian COVID-19 hri kai mi 36 hmuh an ni a, Sample enfiah atanga chhutin za zela 57.14 te chuan hri an kai a ni. Heng hri kai hmuhchhuah te hi Rapid Antigen Test hmanga hri kai hmuh te vek an ni a, Aizawl District-ah 17, Lunglei District-ah 12, Siaha District-ah 6 leh Champhai District-ah mi pakhat te an ni a, Sample enfiah dang a awm lo a ni.

Nimin khan Mizoram District 10-ah COVID-19 hri kai enkawl dam mi 186 an awm belh leh a, heti hian nimin tlai thleng khan Mizoram a COVID-19 hri kai hmuhchhuah tawh chu 2,31,714 niin an zinga mi 2,30,289 te chu enkawl dam an ni tawh a, hri kai hmuhchhuah atanga chhutin za zela 99.38 te chu enkawl dam an ni tawh a, hri kai enkawllai mi 717 la awmin hri kai zingah mi 708 an boral tawh a ni.

Nimin tlai thleng khan Mizoram District tinah COVID-19 hri kai enkawllai la awmin Aizawl District-ah hri kai enkawllai tam berin mi 353 enkawl mek an ni a, hri kai enkawllai zawng zawng zatve dawn chu Aizawl District-a awm niin Lunglei District-ah mi 120 enkawl mek an ni a, hri kai enkawllai tlemna ber Siaha District-ah mi 2 enkawl mek an ni.