Independence Day hman dan tur ruahman a ni
Kumin a India Independence Day lawm dan tur ngaihtuah hian nimin khan Serchhip DC Meeting Hall-ah District Bawrhsap Nazuk Kumar IAS hovin sawrkar mi pawimawh te leh tlawmngai pawl bakah khawtlang hruaitute, Political Party aiawh leh Sipai bang aiawhte an thukhawm a. Kumin-a India Independence Day hi Serchhip Sports Complex-ah August 15, 2022 zing dar 11:00-ah hman tura ruahman a ni a, harsatna a awm a nih erawh chuan Khawtetlang Playground ah hman tur niin Khuallian tur hi State thuneitu sang zawk atanga ruahmanna ngaihchan a ni. India Independence Day hi COVID-19 hri leng avangin nikum leh nikum hmasa ah mipui tel lovin DC Playground leh DC Office Tual-ah sawm bik mi tlem te ten an lo hmang tawh a, kumin ah chuan hri leng ziaawm lai a nih avangin hetiang hian ruahmanna siam a ni a, he ni lawmna atan hian mawhphurhna hrang hrang insem a ni bawk.
Kumin-a Independence Day-ah hian sawrkar laipui chuan ram zalenna kum 75-na lo thleng tur denchhenin India National Flag In tina zar turin ruahmanna a siam a, Flag hi pakhat Rs. 20 zela khul tur niin VC kaltlangin Veng leh khua ah te semchhuah a ni ang. Kum danga an lo tih thin angin he ni pual hian Serchhip-a Home, Hospital leh Jail-ah te thilpek sem a ni leh ang a, Independence Day pual Football Tournament leh Table Tennis Tournament pawh kalpui tur niin kum hnih hnuah VIP's at Home Tea Party pawh buatsaih tawh tura ruahmanna siam a ni.
Comments
Post a Comment