Larsap in IIT Tirupati leh NIT Mizoram Director te kawm

Governor Hari Babu Kambhampati chuan nimin khan Director of IIT Tirupati leh Director of NIT Mizoram te kawmin leimin vanga harsatna thleng thin pumpelh chungchang te, Science thiamna hmanga Mizoram a kuthnathawktute hmalakna tanpuina chungchang te leh NIT Mizoram sak hna thawh dan tur chungchangte an sawiho.

Indian Institute of Technology (IIT) Tirupati-a Director Prof K.N. Satyanarayana leh NIT Mizoram Director Prof. S.Sundar te a kawmna ah hian Governor chuan NIT Mizoram in a zirlaite hmakhua ngaia zirna In tha tak taka mithiamte a thawhpui thin chu lawmawm a tih thu a sawi a. NIT Mizoram in Campus leh Building te an neih hma chuan hetianga mithiamte thawhpui hi a la tul rih dawn a. Thawhhona hrim hrimah hian thil thar tha zawk leh hmasawnna thar a lo awm thin bawk a ni, a ti a. NIT Mizoram chu a awmna rei tawh mahse vanduaithlak takin a sakna tur ram chungchangah tihfel ngai te tihfel chhung a rei ta deuh a. Tunah erawh chuan chinfel ngai te pawh NIT Mizoram leh Mizoram sawrkar thawhrimna azarah a fel thawkhat tawh a, a lawmawm hle a ni, a ti bawk.

He hunah hian Prof. K.N. Satyanarayana chuan Governor hnenah hian Technology Innovation Hub in Positioning and Precision Technologies, IIT Tirupati leh NIT Mizoram te tangkawpin ni 5 chhung awh inzirtirna - Training on Remote Sensing and Geospatial Technology for Landslide Mitigation and Management in North Eastern Regionan buatsaih mek tih a sawi a. IIT Tirupati chu Remote Sensing and Geospatial Technology-ah hmahruaitu an nih thu a sawi a. He thlalem hmanga leilung zirchianna hi kawng tam takah tangkai takin hman theih a ni tih sawiin, Positioning and Precision Technologies chu Horticulture, Agriculture, Landslides mitigation leh thil dangah Mizoram in a tangkai pui a rin thu a sawi a. Hemi kawngah hian NIT Mizoram nen pawh thawhhona an la neih theih thu a sawi bawk.

NIT Mizoram Director Prof S.Sundar pawhin Mizoram tana NIT Mizoram tangkaina tur te a sawi a. A hmasa berah chuan Campus leh building an neihna tur kawngah tanlak phawt an tum tih a sawi a. NIT Mizoram sakna tur atan Environmental Clearance chu hun rei tak buaipui a nih hnuah a hmawr bawk tep a ni tawh a. Tunah hian Ministry-ah an dilna hi a awm tawh a; hun rei vak lo ah chuan NIT Mizoram campus siam leh building sak hna pawh tan theih an in beisei tih a sawi a. Phalna a rang lama hmuh a nih theih nan Governor chu Ministry lama nawr turin a ngen bawk a ni. Prof S.Sundar chuan NIT Mizoram hmunhma zau zawng chu 150 Acre vel a ni tih sawiin, sak zawh a nih chuan chuan NIT awm mek zinga tha ber pawl a ni dawn a ni, a ti bawk.

Comments

Popular posts from this blog

Tukverh-a tlasual boral