Assam Rifles-ten Aizawl laili an chhuahsan hun tur chu hriat theih a la ni lo - Home Minister

Home Minister Lalchamliana chuan Assam Rifles-ten Aizawl laili an chhuahsan hun tur chu hriat theih a la ni lo tih sawiin, hetihlai hian tun dinhmunah Mizoram sawrkar chuan sawrkar laipui-a Ministry of Home Affairs (MHA) thu a ngaichang mek nia thudawn a ni. 

Zawhna chhangin Home Minister Lalchamliana chuan Aizawl laili a awm, Assam Rifles-te chu sawrkar laipuiin an chhuah hun tur rawn ruatsak tawh mah se, tun dinhmunah chuan Aizawl laili an chhuahsan hun tur a la hriat loh thu sawiin, tunhnai khan Mizoram sawrkar aiawhten an insawn chhuahna tur, Zokhawsang an enfiah tih a sawi a ni. Hemi chungchangah hian Mizoram sawrkara Home Secretary H. Lalengmawia (IAS) pawhin Assam Rifles insawnchhuah chu Mizoram sawrkarin a ngaih thu tak thu leh Ministry of Home Affairs kaihhruaia Assam Rifles-te insawnchhuahna tur, Zokhawsang hmun enho leh Meeting neih chungchangah MHA an ngaihchan mek thu a sawi bawk. Union Home Secretary Ajay Bhalla chuan Assam Rifles insawnchhuahna tur a hmun a enho leh tul dangte sawiho tura June, 2022 chhunga Mizoram-a Ministry of Home Affairs-a Addl. Secretary tirh a nih tur thu a sawi chu engemaw harsatna vanga a rawn kal tak loh thu sawi bawkin, Union Home Secretary hnenah hriat nawntirna an thawn tawh thu te, chu chu an la ngaihchan mek thu te a sawi bawk.

Assam Rifles-ten chhuanlam hrang hrang an neih thinah pawh Mizoram sawrkarin hma an lak thu Ministry of Home Affairs hotute hnenah an thlen tih sawi bawkin H. Lalengmawia chuan, “Kumin May 24 khan Dy. Chief Minister Pu Tawnluia pawhin tun thlenga Assam Rifles-te an la insawnchhuak lo chu pawm thiam harsa an tih thu Union Home Secretary hnenah a thlen,” a ti bawk.

Home Secretary H. Lalengmawia sawi danin Assam Rifles-te insawnchhuahna tur Zokhawsang chu peihfel a ni thawkhat tawh a, Mizoram sawrkar pawhin a tih tur chinah theihtawp chhuaha thawkin Ministry of Home Affairs-in Zokhawsang hmun buatsaih tura a rawih contractor-te pawh nawr reng an ni.