Court in thutlukna puang dawn

Vawiin chawhma dar 11:00 hian Special Court (Prevention of Corruption Act) Judge chuan eiruk thubuai a thiam loh a chantir mi 13-te hremna tur a puang dawn.

Thiamloh chang zing ami BJP MLA awmchhun Dr. BD. Chakma Assembly Member atanga paih a nih leh nih loh tur chungchang chu hrem a nih dan a zira bawhzui tur a nih thu Assembly Speaker Lalrinliana Sailo chuan a sawi a. Hetiang hi uluk taka kalpui tur chi a nih avangin dan lam mithiamte rawn chunga kalpui a ni ang a ti. Thiamloh chang zing ami, Chakma Autonomous District Council (CADC)-a Chief Executive Member (CEM) ni lai mek Buddha Lila Chakma te, EM ni lai mek Ajoy Kumar Chakma leh Mohan Chakma bakah MDC pahnih Buban Kumar Chakma leh Amit Kumar Chakma te chungchang erawh chu Larsap ngaihtuah tur ni a thudawn a ni a. Raj Bhavan Official-te chuan CEM, EM leh MDC-te thiamloh chantir an nih avanga an chungchang rel tur chuan District Council and Minority Affairs lam atanga bul tan tur a nih thu an sawi a ni. Dr. BD. Chakma hi Mizoram-ah MLA ni lai thubuai a thiamloh chantir hmasak ber ni a hriat a ni a, Supreme Court-in July 10, 2013 khan MP leh MLA-te Court-in thiamloh a chantir, a tlem berah kum 2 tang tura a hremte chu MP/MLA an nihna atanga bantir tur a ni, a ti a ni.