Mizo sipaite India ram tana an hnathawh leh inpekna ziahna lehkhabu tlangzarh

Mizo sipaite India Independence hma leh hnua ram tana an hnathawh leh inpekna chungchang, Thlalak leh thuziah telna lehkhabu Coffee Table Book 'Lest We Forget' tih chu nimin khan Home Minister Lalchamliana chuan Assembly Annexe-ah a tlangzarh.

Sainik Welfare & Resettlement Department hnuaia awm District Sainik Welfare & Resettlement, Aizawl buatsaih 'Lest We Forget' tih tlangzarhna hunah hian Home Minister chuan British hunlaia Indopui II-na atanga India a zalen hnua Indo hrang hranga Indian Army-a tang tawh Mizo sipaite chanchin tarlanna lehkhabu buatsaih chu a hlu takzet tih sawiin, thangthar leh Academic Research buaipui te tan phei chuan a hlut lehzual a rin thu leh, sipai-a Mizote thawhhlawk dan chhuina kawngah pawh lehkhabu tangkai tak a nih ngei a beisei thu a sawi a. Sipai tang tawh te chu sipai atanga an ban hnuin ram tan an tangkai zel thu sawiin, Mizo khawtlangah phei chuan an thawh hlawk hle a, Mizo Society a tha zawnga siamtu an ni tih hi tuman an hai lovang, a ti a. Politics-ah phei chuan Mizo sipai Officer pension engemawzatin hmingchherin ram tan an thawhhlawk hle tih a sawi bawk.

Nimin-a he lehkhabu tlangzarhna hunah hian Capt. (Prof) Lalkima chuan Lehkhabu thlirna leh a chanchin sawizauna neiin he lehkhabu ah hian Mizote Indopui I-na leh Indopui II-na ah an tel dan te, India Independence hnua Indo hrang hrang awma ram tana an inpekna chanchin te tarlan a nih thu a sawi a. Mizote zinga huaisenna leh chawimawina dang dawngtu chanchin te pawh a sawi a. He lekhabu-ah hian Mizo sipai leh Officer a lo tang tawh chhuanawm tak tak te chanchin tawi pawh a tel bakah Indopui II-na a V-Force a tel Mizo zawng zawng te hming a tel kim vek bawk a. Hei bakah Sipai chawimawina hrang hrang dawngte, Indo hrang hrang leh Operation hrang hranga ram tana nunna pe sipai hming te pawh tarlan a ni. 

Home Minister hian Indopui II-na a tel zinga la dam mi 31 zingah he programme hmang tura kal mi 5 – Hav. Lalbiakthanga Padma Shri; Lance Naik Kawlhlira, Sepoy Rosanga, Sepoy Zaduha leh Hav. Kaphlira bakah Rfl. C. Kamlova Padma Shri leh ram tanna nunna hlan sipai nupui 3 te hnenah lehkhabu copy hi a hlan a, he hunah hian Indopui II-na Mizo sipai tel la dam mi 5 leh sipai bang thahnem tak an tel bakah Assam Rifles hotute an tel a ni.

Mizo zinga British hunlaia Army Commission Officer hmasa ber pahnih te chu Maj. RK. Hranga leh Brig. T. Sailo te an ni a. Indopui II-ah khan Mizote zinga huaisen lawmman Military Cross dawng mi 2 – Sgt. Saihnuna leh Sub. R. Khawma an awm a. Subhash Chandra Bose a din Indian National Army zawmtu a hunlaia British sipai Darthawma chu Mizo zinga Indian Freedom Fighter awmchhun niin zalenna sualtu te hnena chawimawina sang pek thin Tamra Patra dawngtu awmchhun a ni.

Comments

Popular posts from this blog

Tukverh-a tlasual boral