Union Sports Minister hnenah puihna dil

Sports and Youth Services Minister Lalnghinglova Hmar chuan Union Sports Minister hnenah sawrkar laipui puihna a dil.

Zirtawpni khan Sports Minister Lalnghinglova Hmar hian Union Sports Minister Mansukh Mandaviya chu New Delhi-ah kawmin India ramin kum 2036-a Olympics thlen a tumnaah Mizoram chuan tel ve ngei a duh thu leh Mizoram in Sports Conclave buatsaiha bul a tan tawh thu a sawi a. Hemi kawnga hmalakpui turin Union Sports Minister hi sawmin, Mansukh Mandaviya hian project siama a rang lama thehlut turin thurawn a lo pe a ni. Hei bakah hian Lalnghinglova Hmar chuan Mizoram chu State lian lo tak, mihring pawh tlemte awmna a ni chungin India ramah Sports avangin hriat a hlawh tih sawiin, State rethei zawk tan Budget-ah sports hmasawnna tur dah tam a harsat avangin sawrkar laipui in a puih zel a tul thu a sawi a. Union Sports Minister chuan puih ngei a tiam bawk niin sawrkar thuchhuah chuan a tarlang a. Mizoram-a zina Sports hmasawnna tur a hmun ngeia sawi dun tura a sawmna chu Mansukh Mandaviya chuan tihlawhtlin ngei a tum a, kumin chhung ngeia Mizoram tlawh a tum thu leh Mizoram in 'Vision 2036 Olympics' a neih chu lawmawm a tih thu a sawi bawk.