Lungphunlian khaw dai puk-ah ruhro hmuchhuak

Champhai District chhung Lungphunlian khaw daia Kanghmun kham puk chhungah mihring ruhro thahnem tak hmuhchhuah a ni.

Lungphunlian VCP Lalhlimpuia sawi danin Lengteng Wildlife Sanctuary hnuaia Wildlife Guard Duty pakhat, Lalropuia chuan tunkar Thawhtanni khan Lungphunlian khua atanga hmar lam Kilometer 2 vela hla, Kanghmun puk an tih chhungah mihring ruh ro, khabe ruh, ngal ruh, Ha leh Lu ruh ni ngeia hriat thahnem tak leh Hlumbel keh darh tawh te a hmu a; tunhma lamah pawh helai hmunah hian ruhro them tlem azawng chu hmuh a ni tawh thin a, amaherawhchu enchian leh ngaihsak zui a ni thin lova. Niminpiah-a Kanghmun Puk enchian a nih takah heng thil chi hrang hrangte hi hmuh belhin khawtlang hruaitute hi a hrilh ta a ni.

Lungphunlian khaw kiang, Kanghmun-ah hian tunhmain mihring an cheng tawh thin a. Kum 1912 atanga kum 1915 vel khan an khaw pumpui chu kangmeiin a kan chhiat avangin he hmun atang hian tuna Lungphunlian khaw hmunah hian an insawn ta niin thudawnna chuan a sawi. Kanghmun puk hi a dung ft. 20 vel leh a vang ft. 12 vel a nih laiin a san zawng erawh a inang lova, ft. 18 vbela sang te a ni.