Sports Minister in Durand Cup a hawng

Sports Minister Lalnghinglova Hmar chuan nimin khan SAI Stadium, Kokrajhar, Assam-ah ‘Durant Cup 2024, Kokrajhar Chapter’ chu a hawng.

NorthEast Football Development Council President ni bawk Lalnghinglova Hmar chuan, State lian lo leh mihring pawh tlemna Mizoram atangin ISL leh I-League ah player thahnem tak an awm reng thu sawiin, FIFA World Cup qualifier khelh zawh tak ah pawh India squad-a player 22 zinga 4 chu Mizo an nih thu a tarlang a. Bodoland-ah pawh Indian Football Level sang ber thleng thei tur theihna tha tak tak nei an awm tih  a sawi bawk.

Indian Football calendar khuhhawnna Durand Cup hi kum 1888 a khelh tan niin kumin hi a vawi 1330-na tur a ni a, Asia khawmualpui a Football Tournament upa ber niin khawvel huap pawhin English FA Cup leh Scottish FA Cup te nen Football Tournament upa pathum zing ah a tel a. Durand Cup 2024-ah hian Indian Super League, I-League, Indian Services, Central Armed Police Force bakah foreign team sawm bik te nen Team 24 telin Kolkata, Shillong, Jamshedpur leh Kokrajhar-ah te khelh tur a ruahman a ni. Final hi August 31, 2024-ah Vivekananda Yuba Bharati Krirangan, Kolkata-ah khelh a ni ang.

Durant Cup 2024, Kokrajhar Chapter hawnna ah hian Bodoland FC leh ISL Club NorthEast United FC te an inhmachhawn a, Kokrajhar-ah hian Group E match bakah Quarter Final match pakhat khelh a ni ang.