Serchhip tan Community Radio Station tangkai ring

Chief Minister leh Serchhip bialtu MLA, Lalduhoma chuan Serchhip leh a chhehvel-a Lo leh huan nei (farmers) te tan Community Radio Station din ve theih a nih chuan a tangkai a rin thu a sawi.
IIMC Aizawl, MZU Campus-a India rama Community Radio Station 500-na chu nimin khan Union Minister of Information & Broadcasting Ashwini Vaishnaw chuan Delhi atangin biak hmuhtheihna kaltlangin a hawng a, he hun hi Chief Minister Lalduhoma hian a Office atanga lo zawmin Mizoram-ah Community Radio Station hawn a ni ve ta chu lawmawm a tih thu a sawi a. A bial, Serchhip chu a chhehvel ram ten azir avangin lo leh huan nei (farmers) an tam thu sawiin, anni puala Community Radio Station din ve a nih theih chuan loneitute zirtirna atan te, khaw chin leh an tana hriattur thil pawimawh te hrilhhriat nan a tangkai hle a rin thu a sawi a ni.

Community Radio Station hi ram bial zim deuh zawk, KM 12-15 bial huam thei FM Radio a ni a, Non-Profit Organisation/Institutions, KVKs, NGOs, registered society leh Charitable Trust ang chiten an dil thei a. A senso hi cheng nuai 10 - 15 vel a ni thin a ni.