ASF hri lenna hmunah Veng pahnih puan leh a ni
Serchhip District AH&Vety Officer Dr. H. Vanlalrawna chuan hemi chungchang ah hian thuchhuah siamin tunhnai khan Serchhip Dinthar leh Serchhip Kawnpui huamchhungah hain Vawk a thih nual thu leh heng Vawk thi te hi African Swine Fever (ASF) vanga thi an ni tih finfiah a nih tawh thu a tarlang a. Hei vang hian July 25, 2024 atangin Serchhip Dinthar leh Serchhip Kawnpui te hi Vawk hri lenna hmun, Infected Area-ah puan a nih thu a tarlang a, hmundang-a Infected Area lo puan tawh angin inkhuahkhirhna pawh kalpui leh tur a ni ang. Heti hian Serchhip District-a Veng leh khua 20 te chu ASF hri lenna hmun ah hian puan a ni tawh a, Vawk hri leng avanga harsatna thleng Veng leh khua 9 te chu hri lenna hmuna puan ala ni ve lo thung a ni.
Hetihlai hian nimin khan Serchhip District-a Veng leh khua 9-ah ASF vanga Vawk thi 25 lai a awm belh leh a, heng zinga 13 te chu North Vanlaiphai-a mi niin Chhiahtlang, New Serchhip South, Chanmari leh Chhim Veng-ah pahnih theuh an thi a, Chhingchip, Baktawng, Leng leh Ser-chhip Dinthar-ah Vawk pakhat theuh an thi bawk a, kumin a Serchhip District-a ASF vanga Vawk thi chu 1654 a tling tawh a ni. Nimin vek khan Veng leh khua 9-ah hri leng darh zel tur venna atan Vawk 33 suat leh ni bawkin kumin chhungin Vawk 4252 suat a ni tawh a ni.
Comments
Post a Comment