JERC for Manipur leh Mizoram chu thenin Mizoram Electricity Regulatory Commission din a ni

Mizoram leh Manipur ten Electric ngaihtuahtu tur intawm an neih thin, Joint Electricity Regulatory Commission (JERC) for Manipur & Mizoram chu then a ni ta a. Er. Benjamin L.Tlumtea chu MERC Chairperson hna lo chelh lailawk turin tih a ni.

Mizoram leh Manipur State-in Electric enkawl kawnga thuneitu sang an intawm, Joint Electricity Regulatory Commission (JERC) for Manipur & Mizoram an din hi then a nih thu Zirtawpni khan hriattirna tihchhuah a ni a, hemi hnu hian Mizoram Electricity Regulatory Commission din niin July 23, 2024-a hna tan tura tih a ni a,. heng State pahnih te hian JERC hi a hrang ve ve-a neiin thawktute pawh an insem dawn a. Mizoram Electricity Regulatory Commission (MERC) Chairperson hna lo chelh lailawk tur hian JERC Member nilai Er. Benjamin L.Tlumtea chu ruat a ni.

JERC hotute sawi danin July 23, 2004 khan Mizoram, Manipur leh sawrkar laipui chuan inremna ziakin Electricity Regulatory Commission hi kum 20 chhung atan thawkho tur leh hemi hnuah chuan State pahnihte inbiakremna anga kalpui nise tiin ‘Memorundum of Agreement’ an ziak a. He inremna hi July 23, 2024-ah a tawp dawn tak avangin Manipur sawrkar chuan a mala kal an duh thu an sawi a, Power Ministry-ah a hranpaa State Electricity Regulatory Commission an dil angin Central pawh hian Mizoram sawrkar chu an ngaihdan a zawt a. Mizoram sawrkar pawhin a remtih avangin kum 20 an lo thawhho tawhna chu a tawp ta a ni.

State pahnihte awm dan tur chungchang zawhna chhangin Mizoram Electricity Regulatory Commission (MERC) Chairperson lailawk Er. Benjamin L.Tlumtea chuan, “State pahnih hi kan inthen dawn chuan a thawktu (post) hi a zatve (50:50)-a insem tur a ni a. Tun dinhmunah regular-a thawk mi 29 an awm mek a, heng zinga 15 hi Mizoram in a chang ang a, a bak 14 hi Manipur-in a chang dawn a. Anni bakah hian PE, Driver leh Group D an la awm bawk a ni,” a ti a. Tun dinhmunah JERC hi Goa & UT leh J&K & Ladakh bak nei an awm lo niin a sawi bawk.

State Electricity Regulatory Commission chu thuneihna sang tak nei a ni tih pawh sawi bawkin Er. Benjamin L.Tlumtea chuan, “Electric chungchangah chuan Court thuneihna, Quasi Judicial Authority a nei a. Power hman man bithliah emaw, pekchhuah leh thil dangah te State-a thuneitu ber a ni a. Mipuiten êng chhit man leh thil dangah sawiselna an neih pawhin thutawp siam theitu a ni,” a ti bawk.

JERC for Manipur & Mizoram inenkawlna senso hi State pahnihte hian zat leh zatin an intumsem thin a. Mizoram in a hranpaa State Electricity Regulatory Commission a neih dawn takah chuan kum khat chhunga JERC a inenkawlna senso tur hi cheng vbc. 8 vel ni tura chhut a ni bawk.