Ruihhlo do puala Video/Reels Competition result puangin Ruihhlo Do Monitoring Apps tlangzarh a ni

Ruihhlo dona atana Video/Reels siam intihsiakna a lawmman chu nimin khan semin Ruihhlo Do Monitoring Apps chu tlangzarh nghal a ni bawk.

Working Committee on Ruihhlo Do, 2023 in ruahmanna a lo siam tawh angin Video/Reels Competition on Drug Prevention result puanna leh lawmman sem hun bakah Monitoring Apps epi.info for Ruihhlo Do tlangzarhna hun hi nimin khan Aizawl-a SAD Conference Hall-ah neih a ni a, Lalzarmawii IAS, Commissioner & Secretary, Social Welfare, Tribal Affairs, Women & Child Development Department chu khuallian niin kum kalta ah khan Working Committee on Ruihhlo Do hnuaiah hian Sub-committee on Social Media chu din a ni a, anni hmalakna hian School zirlaite (Class 9 – Class 12) zingah leh College zirlaite zingah ruihhlo laka invenna atan Video/Clips Competition chu buatsaih a ni a. Heng Category pahnih atang hian Video clip 22 a lut a ni. High School leh Higher Secondary School te tana intihsiakna ah R. Lallawmsanga chu pakhatna niin College & University Category-ah Lalngaihsaki Hauhulh chu pakhatna a ni bawk.

Kum kalta khan District tinah leh sawrkar department hrang hrang ah leh YMA, Tlawmngai Pawl (NGO) hrang hrangah Ruihhlo Dona atan sum pek an ni a, sum dawngtute pawhin theihtawpin hma an la mek zel tih sawrkar thuchhuah chuan tarlangin, Ruihhlo Dona atana heng hmalaknate hi awlsam taka inhriatpawh zung zung a nih theih nan Monitoring Apps ‘epi.info for Ruihhlo Do’ chu buatsaih a ni a. He Apps hi tangkai taka hman a nih theih nan Lalzarmawii IAS hian a tlangzarh nghal bawk a ni.