Mizoram-a Surveyor indaihlohna phuhru turin Private Survey Firm te empanel turin hmalak a ni

Revenue Minister B. Lalchhanzova chuan tunlai thiamna hmangin Mizo mipuite tana awlsam leh chak zawka hna thawh a ni dawn tih sawiin, Surveyor indaihlohna avanga mipui tawrhna phuhru turin Private Survey Firm te empanel turin hmalak mek anih thu a sawi bawk.

Nimin khan a Pisa-ah thuthar lakhawmtute kawmin Revenue Minister B. Lalchhanzova chuan an Department hnuaia hmalakna hrang hrang a tarlang a, he hunah hian Revenue Minister chuan Land Revenue & Settlement chu January 21, 1972-ah din a ni tih sawiin, an mawhphurhna tlangpuite chu Survey, Settlement leh Land Records vawn bakah Chhiah lak anih thu a sawi a. March ni 29, 1994-ah Major Department-ah hlankai niin Directorate of Land Revenue & Settlement chuan ram teh, Land record vawn leh ram chhiah khawn te thawkin Directorate of Registration and Stamps chuan ram in hralh, lei leh dahkham bakah thil in hralh reng reng sawrkar hriatpui anih nemngheh nan Stamp duty leh registration hna te an thawk tih a sawi a. Tun dinhmunah an Department-ah hian Group A-ah Sanctioned Post 34-ah 12 ruakin Group B-a Post 260-ah 135, Group C-a Post 163-ah 76 leh Group D-a Post 493-ah Post 223 chu hnawhkhah loh a nih thu a sawi a ni.

Revenue Minister chuan mipui leh sawrkar indawrna a harsatna awm leh thil kalmuang lutuk tih ziaawma, sawrkar kalphung fel zawk siam turin kawng hrang hrangah hma an lak mek thu sawiin, heng zingah hian Ram pass siam chhung rei lutuk tihtawi dan kawng dap mek anih thu a sawi a. Hemi atan hian Surveyor lak belh turin July 9, 2024-ah MPSC in Advertisement a tihchhuah tawh thu te, Empanelment of Survey firm chu peihfel tep a nih thu te, LSC/Pass hmingthlak timuangtu lian tak map drawing chu chak zawka kalpui anih theih nan leh thawktu indaihloh phuhruk nan Map drawing hi engemawzat outsource tum anih thu leh LSC siam leh tihdanglam process thui lutuk leh dawhkan paltlang hnem lutuk chu Department Officials te nena inrawnin tihtlem/tawi dan kawng dap tum a ni tih a sawi a. Survey khawl leh khawl hmanga ram teh tawh sa data process nana khawl pawimawhte nal taka khawih thei turin Concerned Staff te training hmanga tuaihriamna tur ruahmanna siam tum anih thu a sawi bawk.

Revenue Department-ah Surveyor post 137 awmin heng zinga Post 76 te chu hnawh khah loh a nih thu Minister chuan sawiin, Surveyor 15 lakna turin Advertisement tihchhuah chuan engemaw chen a chhawk an beisei tih a sawi a. “Surveyor post zawng zawng pawh hnawhkhah nise kan ram than dan enin mipui mamawh hi duh angin kan phuru zo dawnin a lang lo. Surveyor indaihlohna avanga mipui tawrhna phuhru turin Private Survey Firm te empanel turin hmalak mek a ni a. EoI chhuah niin Firm 17 in an chhang a. Tun atanga rei vaklo ah chuan hei hi tihfela Firm te hi chhawr tan theih kan in beisei a ni,” a ti a. Mi harsa zawk, Private Firm ruai ve thei lo te tan sawrkar Surveyor te service chu a bo dawn chuang lo tih a sawi bawk.

Kumin March 28 khan Order tichhuakin District hrang hrang a pending case an neih te dil khawm a nih thu Minister chuan sawiin, a vaiin 13,908 a awm thu a sawi a, May ni 7, 2024 khan heng pending case zinga kum 2021 thlenga dawn tawh chin chu June 2024 ralhmaa tifel vek tur leh chumi hnu lama dawn te chu pending clear dan thla hnih (2) dan-a report thin tura in hriattir tih a sawi.

Hei bakah hian Revenue Minister chuan AMC chhungah Online Land Tax Payment kalpui mek a ni tih sawiin, Mizoram pumah pawh kum 2025 ralhma ngeiin Online Tax Payment kalpui a nih theih nan hmalak mek a ni, a ti a. District thar pathum-a Revenue Office te chu thuam chak tura hmalak mek a nih thu pawh a sawi bawk.