Mizoram Police te fitness tihthat lehzualna atan August 5, 2024-ah a huho in Parade neih a ni dawn

Mizoram Police te fitness-ah hma an sawn theih nana hmalakna kal zelah August 5, 2024 khian Mizoram puma mahni awmna theuh-ah Police te chuan a rualin Minute 45 chhung Training Parade hun an hmang dawn a, Home Minister chuan Police-in kuhva an man tawh sa Kudam atanga rukbo a awm lo niin a sawi bawk.

Thuthar thehdarhtu thenkhatin an kawmnaah Home Minister K. Sapdanga chuan Mizoram Police-te tan fitness pawimawh zia sawrkarin a hriat thu leh Fitness-ah hma an sawn theih nan ruahman an siam thu a sawi a, “Kan Police-te fitness a that lehzual theihna atan hma kan la dawn. A bultanna atan August 5, 2024 hian Mizoram Police zawng zawngte a rualin zingah minute 45 chhung kan parade rual dawn. Mahni awmna hmun theuhah Parade a ni dawn,” a ti a. Police te chu rampawn a awm te an awm thu leh Post hrang hranga awm te pawh an awm thu sawiin, chung mite chu an awmna hmunah theuh hun bi an siam zing dar 7:00-ah a rualin an parade dawn tih a sawi a. Aizawl-ah chuan a huhoa parade na hmun atan 1st Bn. MAP Playground, Armed Veng, Aizawl ruat a ni tih a sawi bawk.

Home Minister K Sapdanga chuan a huho a Parade chu Police-te fitness a that lehzual theihna tura an bultanna tur chauh a nih thu sawiin, “Mizoram Police Sports pawh kalpui a ni dawn a, chutah chuan a tam thei ang an tel theih dan tur ruahmanna siam a ni ang. Ruahmanna hrang hrang dang pawh siam a ni,” a ti bawk.

Home Minister chuan Police kuhva rah man sa kudam atanga a bo ang deuha sawite a awm tih sawiin, “Police-in kuhva rah an man sa bo a awm lo. Kudam te endik a, kuhva rah ip awm zat chhinchhiah a ni. A hnuah manin, kudam kalh a ni. Kan man ngei dawn tih an rin avangin a neitute'n kan la man hma siin an lo la chhuak. Heng kuhva rah an lo lak chhuahte pawh hi Police leh kuhva chingtute tangkawpin engemaw zat an hmu chhuak leh tawh,” a ti a. Kuhva rah tawlhruk a reh theihna atan theihtawp an chhuah tih sawiin, “Kawng ruk ringawt pawh 30 vel an siam a, kawng ruk helnate pawh an siam lehzel a ni. Chuti chungin theihtawp kan chhuah a, MNF hunlai ai chuan kuhva rah tawlhruk hi a tlem tawh hle,” a ti bawk.