Mizoram-ah raltlan thahnem tak an awm mek

Myanmar ram tualchhung buaina avanga sahimna zawnga raltlan rawn lut Mizoram-ah 35,125 an awm mek nia chhinchhiah a ni a, heng bakah hian Bangladesh atanga raltlan rawn lut 2,014 leh Manipur atanga raltlan rawn lut 4,215 an awm mek nia hriat a ni bawk.

Tunhnaiah Myanmar atanga Mizoram-a raltlan rawn lut an pun leh hnuah Myanmar atanga Mizoram-a raltlan rawn lut hi mi 35,125 an awm mek nia chhinchhiah a ni a, an zinga mi 17,004 te hi Relief Camp 133-ah awmin a dang mi 18,121-te erawh chuan an chhungte leh thiante an belh bakah In luahin an khawsa nia chhinchhiah a ni. Myanmar raltlan tam berna Champhai District-ah chuan tunah hian raltlan mi 15,505 an awm mek a ni.

Hetihlai hian sawrkarin a chhinchhiah dan hnuhnung berah chuan Bangladesh-a Chittagong Hill Tracts atanga Lawngtlai District-a raltlan awm zat chu mi 2,014 an ni a. Anni hi Lawngtlai District-ah vek an awm a. Chittagong Hill Tracts-a Zofate awmna bial-a inhung bikna leh thuneihna sang zawk ngiattu Kuki-Chin National Army (KNA) leh Bangladesh sipaite nasa taka an inkah avanga sahimna zawnga rawn raltlan an ni. 

Manipur-a nikum May ni 3-a chi leh chi intihbuaina avanga an sahimna zawnga Mizorama lo lut erawh an tlem hret niin a lang a, Manipur atanga raltlan rawn lut hi an tam vang lai chuan mi 12,000 an kai a, tun dinhmunah chuan District 8-ah mi 4,215 an awm mek niin chhinchhiah a ni.