IT hmang tangkai Department leh Office te hnenah ‘Govt. Online Excellence Awards, 2024’ hlan an ni
Information, Communication & Technology Department buatsaih a ‘Government Online Excellence Awards, 2024’ hlanna hun Assembly House Annexe Conference Hall-a neih ah hian Chief Minister Lalduhoma chuan khawvel kalphung hi IT hian a thlak danglam chho zel tih sawiin, “e-commerce te, Telemedicines te, Online payment te leh Social Media platforms tam tak a lo chhuak a. Khawvel ram zau tak ni thin kha a lo tizim ta kawk mai a ni,” a ti a. He awlsamna hi sawrkar inrelbawlna lamah pawh kan chhawr nasat thu leh a lawmawm thu sawiin, “Hna thawh rang zawk, awlsam zawk leh tlawm zawk min pe a, mipui tan leh sawrkar tan hlawkna min pe ve ve a, huapzo sawrkar neihna hmanraw tangkai a ni,” a ti a. Vawiin a website tha tak nei te, Online Service kalpui mek te pawhin lo uar chho deuh deuh tura chahin, a la hmang tha tawk lo te pawh lo hmang tha turin a chah a, Department thenkhat chuan an update tha tawk lo tih te pawh an hriat thu leh han contact zuina tur Address dah mumal lo te pawh an awm nia hriat a nih thu sawiin, “CM Office hian uluk lehzuala lo enzui che u kan tum a ni,” a ti.
Chief Minister chuan an sawrkar chuan a tir phat atangin IT hman an uar tih sawiin, “Mipui Aw te, CM Online te tha takin kan kalpui zui a. Tangkai lehzuala hman tumin SIT Dashboard, kan rama Projects kan kalpui zawng zawngte engtiklai pawha kan lo endik theihna tur kan duang mek bawk. Kan peih har tawh lovang,” tiin he huna lawmman dawngtute chu a lawmpui thu a sawi bawk.
He hunah hian Information, Communication & Technology Department changtu Minister Dr. Vanlalthlana pawhin IT lama hmasawnna chuan sawrkar inrelbawlna man nasa takin a titlem tih sawiin, “Lam hla zawk atanga sawrkar Office dawrtute tan remchang tam tak chhawp sakin, awlsamna min pe. Chuvang chuan IT lama hmalakna kan uar deuh deuh a tul a, mite hnunga kal lova an hmaa kal kan tum zawk tur a ni,” a ti a. Tunlai khawvelah chuan IT hman tangkai hi duhthlan thil a ni tawh lova, tihmakmawh thil a ni zawk a nih thu a sawi bawk.
Chief Secretary Dr. Renu Sharma chuan he hunah hian inlawmna thu sawiin, sawrkar inrel-bawlnaa IT thiltum ber chu mipuite tana awlsamna thlen te, rorelna langtlang leh felfai a awm theihna hmanrua atana hman te a nih thu a sawi a. Mizoram-ah Department leh Office ten tangkai takin an hmang chho mek chu lawmawm a tih thu pawh sawiin, “Kalphung thar, Mipui sawrkar din nana hmanraw inhmeh leh tha em em a ni a. Kan uar deuh deuh a tul a ni,” a ti bawk.
IT hmang tangkai Department leh Office te tana ‘Government Online Excellence Awards, 2024’ hi chi li (4) siam a ni a, Huang khatna ah Department/Office website niin Transport Department chu pakhatna an ni. Huang hnihnaah sawrkar enkawl zirna In te website niin Govt. Aizawl College chu pakhatna an ni. Huang thumna ah Online Service lama thawk tha te lawmman hlan niin Mizoram-a Depuity Commissioner (DC) Office 11 (DC Online zawng zawng) te chu pakhatna an ni. Huang linaah Special Recognition Awards pek niin AMC, Finance, SCERT, Police leh DC Khawzawl te pek an ni.
He hun ah hian Dr. Lalthlamuana, Chief Informatics Officer, ICT chuan lawmman an buatsaih dan a tarlang a. Sawrkar website endik nan Gartner Maturity Model an hmang a, anmahni department in web monitoring system an duan chu an hmang bawk a ni.
Comments
Post a Comment