Thenzawl-a Zirlai tithate chawimawina hun Supply Minister in a hmanpui
Thenzawl Auditorium-a zirlai tithate chawimawina hunah hian Supply Minister chuan ZMP Thenzawl in zirlai tithate chawimawina hun an buatsaih leh zirlai titha chawimawi tur mi 11 lai an awm chu lawmawm a tih thu leh an kal zel na turah duhsakna a hlan thu a sawi a. Kan khawvel ah mi ti tak tak te tan chauh hmun a awm tih sawiin, zakzum lovin kan thil tum ah huaisen takin kawng kan zawh a pawimawh thu leh kan thil tum te Pathian hnenah kan thlen thin tur a ni tih a sawi a, “Pathian in kan hlawhtlin a duh em em a, ‘I ti thei ang, hmalam pan zel ang che’ min ti thin a ni,” a ti bawk.
Zirlai kalkhawmte chu an thil tih reng reng a hlawhtlinna an neih theihna turin huaisenna nei tura fuihin Minister chuan, anmahni daltu chu anmahni chauh an nih thu leh mi in an tih theih chu an ti ve thei a ni tih rilru pu a, mahni inrintawkna nei turin a fuih a, mahni inring zo lo tan khawvel ah hmun a awmloh thu a sawi a, hun kal tawha an lo hlawhchham tawhna te kalsan a, tisual nawn leh tawhlo tura huaisen taka hmalam pan zel turin zirlaite chu a fuih bawk a ni.
MZP Sub-Hqrs. Thenzawl-a Vice President Laltlanchhuaha kaihhruai he hunah hian Thenzawl khua a HSLC leh HSSLC 2024 Exam-a Mizo zirlai titha mi 11 hnenah chawimawina pawisafai a hlan an ni a. He hun hi MZP General Hqrs. Vice President C. Lalremruata pawhin hmanpuiin Mizoten zonun ze mawi kan zir thar leh a pawimawh thu leh taimakna, huaisenna leh aia upa zahna te vawng nung thar turin zirlaite chu a chah a. Hnamdang nupui pasal a nei lo turin zirlai kalkhawmte a chah bawk.
Supply Minister B. Lalchhanzova hian nimin tlai khan Thenzawl-a Supply Kudam chu tlawhin Kudam tihchangtlun dan turte a en nghal bawk a ni.
Comments
Post a Comment