Nun bul tan tha leh turin tlai luat a awm lo tih sawi

Social Welfare & Tribal Affairs, Women & Child Development Minister Lalrinpuii chuan nun bul tan tha leh turin tlai luat a awm loh thu a sawi.

Social Welfare Minister Lalrinpuii hian nimin khan Sirius leh Cresent House, Lungbial Zemabawk; Rephidim Home, Sunshine Home, Laipuitlang bakah Mizoram State Child Protection Society Office Laipuitlang te chu tlawhin Home a awm mek naupang leh thawktute a kawm a, Minister chuan humsual dai naupangte chu nun bul tan tha leh tura chahin, nun bul tan tha leh turin tlai luat a awm loh thu a hrilh a, nakin zelah an nun an siam that a, Pathian leh hotute thu an awih chuan ram hruaitu thlengin an la nih theih thu a sawi a. Home naupangte chu an nu leh pa te chu eng dinhmunah pawh ding se, an hmusit tur a ni lo tih sawiin, naupang vanneiin sawrkar enkawlna a thlawna an dawng chu hmang tangkai a, an nun siamthatna kawnga chhawr tangkai ngei turin a chah a ni.

Sirius Home hi naupang mipa kum 18 hnuailam ruihhlo lama harsatna nei enkawlna hmun niin tunah hian naupang 9 enkawl lai an awm mek a, kum 2015 atang khan naupang 179 an lo enkawl tawh a ni. Cresent House hi hmeichhe naupang kum 18 tlinglo awmna ni thungin tunah hian naupang 20 an enkawl mek a, kum 2018 atang khan hmeichhe naupang 52 te enkawlna an lo pe tawh bawk a ni. Sirius leh Cresent House-ah hian Home Superintendent hovin thawktu 17 ve ve an awm mek a ni.

Rephidim Home-ah hian naupang rualbanlo 25 enkawl lai mek an nei a, thawktu 17 chu Superintendent hovin an awm mek bawk a. He Home-ah hian naupang rualban lo nu leh pa enkawltu tur nei tha lo te chauh dah niin Mizoram chhunga District tin atanga dah khawmna a ni a. Rephidim Home, Sunshine Home leh Cresent House-te hnenah hian Minister hian tanpuina pawisafai a hlan nghal bawk a. Department-a thawktu ten Minister hi an tawiawm bawk a ni.

Sunshine Society for Children, Laipuitlang, Specialised Adoption Agency hi kum 2008 a din niin tun thleng hian naupang ram chhunga Adoption atana an pek tawh hi 140 a ni a, India ram pawnah naupang 29 adoption atan pek tawh an ni bawk a ni. Tunah hian naupang pahnih adopt theih tur an awm mek a, Superintendent hovin thawktu 11 (Aiya) an awm mek bawk a ni.

Minister hian Child Helpline (1098) Centre bakah State Adoption Resource Agency (SARA) State Project Manager Office a tlawh bakah Child Guidance Centre leh After Care (kum 18 chunglam) mi 19 awmna te a tlawh nghal bawk a. Home-a naupang te hi Home Educator te'n an zirtir bakah School-ah nitin an kal ve thin a ni.