Serchhip District-a Primary School Zirtirtute hnenah Tablets semchhuah a ni

Samagra Shiksha Serchhip District chuan nimin khan Teacher Resource Package (TRP) Innovation hnuaiah nimin khan Serchhip District-a Primary School te tan Tablets an sem.
Nimin a Tablet semna hun hi Block Resource Centre (BRC) Serchhip-ah neih niin Serchhip District Education Officer (DEO) leh Samagra Shiksha Serchhip District-a DPC Lawmawma chuan he hun hi a hmanpui a, Teacher Resource Package (TRP) Innovation hnuaiah zir dan huapzo zawk hmanga kalpui chhunzawm zel a nih theih nan Zirtirtuten Tablet hmang hian Digital Portal hrang hranga Resources leh Content awmte chu hmang tangkaiin zirlaite zirna an pe thei dawn a. School te NISHTHA leh Online Training dangah te awlsam taka an tel/neih theih nan a pui dawn bawk a ni.

Hei bakah hian Tablets an dawn hmang hian Data/Record hrang hrang upload leh vil kawngah School te hmasáwnna a nih zui theih nan leh zirlaite zirna lama tanpuitu a nih theih ngei beisei a ni a, Sum leh pai a tanpuina Rs. 10,000/- zel chu ramchhunga Primary Level-a zirtirtu nuai 25 te tan Tablet leina atan pek an ni bawk ang. Tablet hi zirna kaihhnawih a hman tur a nih avangin Zirtirtu ten anmahni ta anga an enkawl a ngaih em em rualin midang tan pawh hman theih turin School-ah a awm thin tur a ni tih kan thudawnna chuan a tarlang a ni.

He ruahmanna hnuaiah hian Serchhip District chhunga Govt. Primary School 66-ah Tablets 160 sem turin PAB chuan pawmin hemi ang hian semchhuah a ni dawn a, nimin-a he hun hman ah hian Tablets hi semchhuah tan niin Serchhip DEO hian a dawngtu turte hnenah a hlan a. Tablet chungchangah complain a awm a nih chuan School in a dawn ni atanga thla khat chhungin District Project Coordinator (DPC) kaltlang a report tur a ni a, DPC kaltlang lova hmundanga complain chuan awmzia a nei dawn lo a. Complain-ah hian Electric shock, Tek den leh Physical damage te erawh a huam dawn lo thung tih kan thudawnna chuan a sawi bawk a ni.