Pangang puang thunun thei tawh niin hria

Mizoram khawchhak lam Champhai District chhunga Pangang puang, Hnah khawr Pangang chu Agriculture Department hmalakna in thunun a ni tawh.

Champhai-a District Agriculture Officer (DAO) Office sawi danin Hnah khawr Pangang te hi rannung thahna hlo chi khat ‘Super Killer’ hmanga thah an ni a, buh a tihchhiat tawh sa bak chu nghawng na tak dang a nei zui rih lova, rannung chi dang Fall Army Worm (FAW)ang em em a hlauhawm an ni lo niin an sawi bawk.

Thuneituten an chhinchhiah dan chuan khaw hrang hrang pasarih – Leisenzo, Sesih, Khuangleng, Farkawn, Mualkawi, Tuipui leh Hruaikawn-ah te Pangang hi a puang a, heng khaw pasariha chhungkaw 295 te chuan tuarin, ram hectare 169 vela zauah nghawng a nei a ni. Kum dangah pawh Pangang puang hi a lo awm tawh thin a. Champhai District Agriculture Office chuan kumin a puang erawh thlai nasa taka tichhe chi a ni lo deuh niin an sawi a, Pathian zarah an hmalakna a hlawhtlin avangin harsatna lian zawk a thleng zel lo turah an ngai tih an sawi bawk a ni.