Chief Minister hnenah Gas Cylinder hlan

Indian Oil AOD, State Office-a Chief General Manager (LPG) DP. Vidyarthy chuan nimin khan Chief Minister Lalduhoma hnenah Gas bur thar (composite cylinder) a hlan a. Heng bur a hlan te hi Cabinet Ministers te hman tur niin Chief Minister leh Supply Minister hnenah an hman tur bik an lo pe tawh a ni.

Chief Minister hian hun engemaw chen hman lohva awm tawh Mualkhang Gas Bottling Plant siam tharna tur leh Oil Depot thar siamna tura an hmalakna te avangin DP. Vidyarthy hnenah hian lawmthu a lo hrilh a. Oil Depot phei chu Mizoram mipuiten kan nghakhlel tawh tih sawiin, “Chak takin hma la ula, puih in ngaihna apianga pui tur che uin kan inpeih reng a ni,” a ti.

He hunah hian DP. Vidyarthy hian Mualkhanga Bottling Plant chu nitin bottle 6000 chuang thun theihna tura an thuam that chhoh tur thu sawiin, chu chu Mizoram nitin mamawh zat aiin a tam zawk tih a sawi a. Oil Depot siamna tur hmun hi pali an thlithlai mek a, hun reilote ah duh an thlang fel mai tawh dawn tih sawiin, “A hmun a fel chuan hma pawh kan la nghal mai ang,” a ti bawk.

Gas Composite Cylinder hi Gas bur pangngai aiin a zang zawk a, a himin enkawl a awlsam a, a puak thei lova (explosion proof), a tha zawk em em tih pawh sawiin, Mipuiten an Indane distributor-ah theuh ngaihven se an duh thu a sawi a, “Company lam chu kan inpeih tawh a ni,” a ti a. Gas sem dan kalphung fel fai leh mipuite tana awlsam zawk tur an buaipui mek thu pawh Chief Minister hi an hrilh a ni. Nimin-a Gas bur thar (composite cylinder) inhlanna hunah hian Chief Minister hi Supply Minister B. Lalchhanzova chuan a tawiawm a ni.