Mizoram-ah Cyclone Remal tuartu naupangte hnenah chhawmdawlna hlan an ni

Kumin May 28-a Cyclone Remal vanga Mizoram-a vanduaina leh harsatna tawk naupangte hnenah nimin khan chhawmdawlna hlan an ni.

Women & Child Development (WCD) hnuaia Scheme pahnih, Mission Vatsalya leh Mission Shakti-te kaltlanga naupangte chhawmdawlna hlanna hun hi nimin khan Hyve Aizawl City Hall-ah neih a ni a, he hun hmanpuitu Social Welfare Minister Lalrinpuii chuan Cyclone Remal avanga mi tam takin an In leh lo mai bakah nunna hial an chan leh chhungkaw thenkhatte Relief Camp-a an awm a ngaih phah chu pawi a tih thu sawiin, khuarel chhiatna tuartu naupangte chu 'The Juvenile Justice (Care and Protection of Children) Act, 2015' chuan a bika enkawl leh venhim ngai (Children in need of care and Protection) a tihte zing ami an nih avangin ngaihpawimawh an nih thu a sawi a. Sawrkar atanga tanpuina awm ang angte hmanga tuamhlawm an nih tur thu leh heng tanpuinate hi tangkai tak leh hmasawn nana hmang tur leh chhelna leh beiseina nen hma hun thlir tlat turin a chah a. Cyclone Remal avanga chhawmdawl ngai naupang chhinchhiah 96 an awm mek thu sawiin, Women & Child Development hmalaknain a tum khatna atan naupang 41-in tanpuina an dawng chu lawmawm a tih thu a sawi bawk a ni.

Minister Lalrinpuii chuan chhawmdawlna pekte chu zirchianna leh finfiahna atanga teha chhawmdawlna mamawh hmasa zual ngawih ngawiha ngaihte an ni tih sawiin, chhawmdawlna la dawng ve lo te pawhin an la dawn zel theih nan kawng hrang hrang dapin theihtawp chhuaha hmalak zel tum a nih thu a sawi a. Hrisel taka naupang an thanlen theih nan chhungkua leh khawtlang ah boruak zalen, him leh muanawm siam a pawimawh thu sawiin, inrikrapna leh hleilenna chuan a chhe zawngin naupang rilru nasa takin a nghawng theih thu a sawi a. Naupangte seilenna inchhungkhur him leh hlim siam tura hma la theuh turin nu leh pa kalkhawmte pawh a chah nghal bawk.

District Child Protection Unit, Aizawl leh Child Welfare Committee, Aizawl te chuan May ni 31, 2024 atanga July ni 5, 2024 chhung khan Aizawl leh a chhehvel hmun hrang hranga Cyclone Remal-in chhiatna a thlen tuartu naupangte zirchiangin finfiahna hun an nei a, he chhiatna thlengin a nghawng zingah hian naupang 96 lai an tel a ni. He chhawmdawlna programme-ah hian Mission Shakti hnuaia Beti Bachao, Beti Padhao (BBBP) atangin hmeichhe naupang 28 te SSA Account hawn sak an ni a. Naupangte'n ei leh in tur tha an neihna turte, an lehkha zirna puihtu tur leh hriselna tha an neih theihna atana an inenkawlna turin Mission Vatsalya hnuaiah Juvenile Justice Fund atangin naupang 16 te kum khat chhung atan thla tin Rs. 2,000/- theuhin sum leh paia chhawmdawlna (Sponsorship) pek an ni a. Heng bakah hian naupangte hi gift package pek niin, mi inphalte'n Stationery Item-te an pe bawk a ni.