ASF vanga ran damlo enkawlna kawngah theihtawp chhuah tlan a ngai tih Minister in a sawi

AH&Vety Minister C. Lalsawivunga chuan African Swine Fever (ASF) vanga ran damlo enkawl kawngah Department hnuaia thawktute'n theihtawp an chhuah tlan zel a ngai tih a sawi.

Veterinary Diploma Holder Association (VDA) General Conference vawi 26-na nimin-a Vety. Polyclinic Hospital Conference Hall, Aizawl-a neih a hmanpuina ah AH&Vety Minister chuan ASF hri leng avangin Mizoram-ah Vawk vulhtute'n harsatna nasa tak an tawh mek thu tarlangin, AH& Vety Department thawktute lakah mipuite'n beiseina sang tak an nei tih a sawi a. Ran damlo enkawl kawngah Department hnuaia thawktute'n theihtawp an chhuah tlan zel a ngai tih sawiin, “Min mamawhtute tana biak nuam leh dawr nuam, mamawh huna che chhuak thei tura kan inpeih reng a ngai a ni,” a ti a. AH&Vety Department chu kuthnathawktute tana ding leh thian tha tak a nih angin mite harsatna hriatpuia tanpui turin an mamawh phawt chuan ranvulhtute panchilh an inhuam reng tur a ni tih a sawi bawk.

AH&Vety Minister chuan State puitlinga hlankai kan nih atanga kum 38 liam hnu pawha Sa, Artui leh Bawnghnute-a intodelh tura hmalak a ni chunga Vawiin thlenga kan la intodelh lo fo chu ngaihtuah chian a tul thu pawh sawiin, Field Assistant-te chu hemi kawnga hmalatu pawimawh tak pakhat an nih avangin ngaihtuahna thar pu-a intodelh tura tanlakpuiah a sawm a. Sa, Artui leh Bawnghnute-a intodelh turin ranchaw-a intodelh hmasak a pawimawh thu leh hemi kawngah hian sawrkarin theihtawp chhuaha hma a lak chhoh mek thu a sawi a. VDA Member-te chu mipui leh sawrkar laka an mawhphurhna te hlenchhuah tum zel tura chahin, ram leh hnam hmasawn nana theihtawp chhuahpuiah a sawm nghal bawk a ni.

Veterinary Diploma Holder Association (VDA) hi May ni 22, 1981-ah din niin tun dinhmun ah member 129 an awm mek a, nimin-a General Conference an hman hi AH&Vety Department Director Dr. C. Lalrintluanga pawhin hmanpuiin VDA te post chelh theih hrang hrangah indaihlohna nasa tak awm bawk mah se, indaihlohna lang lo khawpa phak tawka thahnemngai taka an thawk thin leh a hlawhtlinna hmuh a ni thin chu fakawm a tih thu a sawi a. Khawvel hmasawn zelah tih dan changkang zawk leh thil thar a chhuah ve zel avangin VDA member-te chu tunhma tih dante ang ngawta kal a rem loh chang pawha insiamrem thiam turin a fuih a. Intuaithar zel tur leh Department hmalakna te ngaihvena hriat zel tum turin a chah a. Department hmasawn nana AH&Vety Minister thahnemngaihna fakawm tiin, thawktu indaihlohna phuhruk a nih theih nana hmalakna te a tarlang bawk.