Serchhip District-ah ASF vangin Vawk 1753 thi tawh

Kumin chhungin Serchhip District-ah African Swine Fever (ASF) vangin Vawk 1753 a thi tawh.

Serchhip-a AH&Vety Department ten an chhinchhiah danin nimin khan Serchhip District a Veng leh khua 8-ah ASF vanga Vawk thi 21 chhinchhiah belh leh niin New Serchhip South-ah 6, Khawlailung-ah 5, Chhiahtlang leh Serchhip Chanmari Veng-ah pathum ve ve leh Chhingchhip, Serchhip Hmar Veng, Serchhip Field Veng leh Serchhip Chhim Veng-ah pakhat theuh te an ni a, nimin vek khan Veng leh khua 9-ah Vawk suat 36 awm leh bawkin heng zinga 19 te chu Khawlailung khuaa mi te an ni.

Inrinni khan Serchhip District-a Veng leh khua 12-ah ASF vanga Vawk thi 44 zet chhin-chhiah belh niin Thenzawl-ah Vawk 18, leh New Serchhip South-ah Vawk 14 an thi a, Veng leh khua 11-ah Vawk 64 suat ni bawkin Vawk suat tamna New Serchhip South-ah 18, Chhuanthar Tlangnuam-ah 17 leh Thenzawl-ah 10 suat a ni bawk.

Heti hian kumin chhungin nimin thleng khan Serchhip District-a Veng leh khua 29-a chhungkaw 1257 te chuan ASF hri leng avang hian harsatna an tawk tawh a, ASF vanga Vawk thi 1753 awm tawhin Vawk 4456 suat a ni tawh bawk a, khua leh Veng 20 zet te chu ASF hri lenna hmunah hian puan a ni tawh bawk a ni.