Helicopter service tan leh ta

Manipur (Churachandpur) leh Mizoram (Ai-zawl) inkara Helicopter Service chu kar hmasa Zirtawpni khan thlawh tan tir a ni leh ta.

Churachandpur leh Aizawl inkara Helicopter thlawk hi kartin Thawhtanni leh Zirtawpni a thlawk tura ruahman a ni a, kar hmasa Thawhtanni-a thlawk tan tura ruahman ni mah se Manipur Transport lamin Pathianni-ah Mizoram lam a an rawn hriattir chauh avangin an inbuatsaih hman lova, Ticket pawh an hralhchhuak hman lo niin Civil Aviation-a thawkte chuan an sawi a. Zirtawpni khan a hmasa ber chu a thlawk ta chauh a, Churachand-pur atangin mi 11 an rawn chuang a, Mualpui atanga Churachandpur lama thlawkah mi 9 an chuang thung a, Mualpui atanga Churachandpur pan Helicopter hi thlawk tlang lovin Lengpui Airport-ah a tui (fuel) a thun kual ziah thin dawn a ni. 

Churachandpur leh Aizawl inkara helicopter Service hi Ministry of Home Affairs remtihna-in nikum September ni 27 atang khan chawlhkar khatah vawi khat a thlawk tan a. Kumin June ni 27 khan tihtawp lailawk niin, tunah hian chhunzawm a ni leh ta a ni.