Vawk thi leh suat awm belh

Serchhip District-a Veng leh khua 12-ah nimin khan African Swine Fever (ASF) vanga Vawk thi 40 lai chhinchhiah leh an ni a, heng zinga 17 te chu Vawk puitling tawh an ni.
Nimin a ASF vanga Vawk thi zinga 12 te hi Serchhip Chanmari Veng huamchhunga mi te niin Thenzawl-ah 6, New Serchhip-ah 5, Khawlailung-ah 4, North Van-laiphai-ah 3, Baktawng, Piler leh Serchhip Chhim Veng-ah pahnih theuh leh Chhuanthar Tlangnuam, Chhiahtlang, Serchhip Vengchung leh Serchhip Dinthar-ah pakhat theuh te an ni. Nimin vek khan Veng leh khua 16-ah Vawk 148 zet suat leh a ni a, Vawk suat tam zualna Chhuanthar Tlangnuam-ah 41 suat niin Thenzawl-ah 32 suat a ni bawk. Nimin thleng khan Serchhip District-ah ASF vanga Vawk thi 1821 leh Vawk suat 4654 a awm ta a ni.