Minister in Durtlang-a Home hrang hrang a tlawh

Social Welfare & Tribal Affairs Minister Lalrinpuii chuan Zirtawpni khan Durtlang-a Home hrang hrang tlawhin Home a awm mek naupangte nen an inkawm a, Home-in harsatna an tawh hrang hrangte a ngaihthlak sak bawk.

Minister Lalrinpuii hian Ferrando Integrated Women Development Centre (Peace Home) tlawhin he Home hi kum 2005-a din a ni a, tunah hian naupang 26 leh hmeichhe humsual dai 7 enkawl mek an ni a. Domestic Workers Training Programme kalpui mek niin Missionary Sisters of Mary Help of Christian (MSMHC) ten an enkawl a ni. Hemi hnu hian Hmeichhe baihvaite tlukluh lailawkna One Stop Centre chu tlawh lehin he Centre hi kum 2016-a din kha a ni a, tun thleng hian hmeichhia harsatna neih avanga tlulut mi 399 an awm tawh a. Thawktu 12 an awm mek bawk a ni. One Stop Centre-ah hian vawi khatah a rualin mi 5 riah theihna buatsaih a ni a. Mi pakhat tan ni 5 leh zan 5 thleng a riah theih bakah an fate hruailuh phalsak an ni a. Hmeichhe naupang kum bithliah awm lo leh mipa naupang kum 8 hnuailam hruailuh theih an ni.

Hemi hnu hian Bethsaida Home tlawh lehin he Home hi kum 2015-a din a ni a, mi 50 awm theihna niin naupang kum 18 hnuailam pianphunga harsatna nei naupang, mipa leh hmeichhia awmna a ni. Naupang 19 enkawl lai awmin thawktu 18 an awm mek a. Naupang awmte hi Cerebral Palsy (tluak zeng) avanga pianphunga harsatna nei an ni tlangpu a ni.

Minister hian Observation Home leh Special Home pawh tlawhin Observation Home hi naupang case nei (in conflict) dahna hmun niin naupang pakua an awm mek a, Special Home hi naupang siam thatna hmun (Rehabilitation Centre) niin kum thum thleng an awm thei a. Tunah hian naupang 20 an awm mek a, Home chhungah hian Middle School kalna tur awmin zirtirtu 5 an nei mek a ni. Hemi hnu hian Daffodils Haven tlawhin mipa naupang kum 16 leh 18 inkar sual lian tham deuh khawih te dahna a ni a. Tunah hian naupang mipa 6 an awm mek a, Hmeichhe naupang case nei te dahna Observation Cum Special Home for Girls pawh tlawhin Hmeichhia 7 an awm ve mek bawk a ni. Daffodils Haven (Place of Safety) leh Observation cum Special Home for girls-ah hian thawktu mi 13 an awm bawk a ni. Daffodils Haven hi Kum 2022 din niin tun thleng hian naupang 22 an lo enkawl tawh a. Kumin January thla attang khan Home hi din tan niin hmeichhe naupang (kum 7 -18) case nei 13 an lo enkawl tawh bawk a ni.

Social Welfare Minister-in Home hrang hrang a tlawhah hian thawktute'n tha taka lo dawngsawngin Jt. Director, WCD Department, Principal Programme Manager, ICPS, DCPO, Aizawl, Deputy Director, WCD bakah Officials dangte'n an tawiawm a ni.