MSPMC-in hnathawh an endik tawh chinah lungawi lohna an hmu nual

Mizoram sawrkarin sawrkar sum hmanga Project thawh hrang hrangte endik leh vil zui tura a din, Mizoram State Project Monitoring Committee (MSPMC)-in hnathawh an endik tawhah lungawi miah lohna an hmu nual.

MSPMC Vice Chairman RL Rinawma IRS (Rtd.) chuan thuthar thehdarhtu thenkhat te hnenah an hmalak tawhna chungchang hi sawiin, Project an tlawh tawh chinah hna tha tak a awm laiin hna tha lo pawh a awm tih a sawi a. “Project thenkhat chu an thawk tha a, thenkhat erawh lungawi miah lohna te a awm a. Project thenkhat chu an hnathawh enin a thinrim thlak a, heng hna thawktute hi a tul chuan Chief Minister hovin kan la puang mai thei,” a ti.

MSPMC Vice Chairman chuan hmun hrang hranga Project an tlawh dawnin pawngpaw tlawh ngawt lovin an hnathawh tur design leh Scheme te, sum senso zat tur te, a quality leh thil dang tul te uluk deuha an zirchian hnuaah an tlawh chauh thin niin a sawi a. “Kan project tlawhte hi a hna a tha em tih te, huntiam chhungin an zo hman dawn em tih te, an hnathawh leh sum senso a inmil em tih te uluk leh chik takin kan en a. Hna tha lo laite kan sawisel a, tha taka thawk an awm laiin thenkhat chu contract pek tlak tawh loh hiala kan ngaihte pawh an awm a. Heng hna thawk tha lo hi chu black list turin sawrkarah ngen (recommend) kan tum a ni,” a ti.

RL. Rinawma chuan tun dinhmunah sawrkar ding laiin contract a pekte chu an la tlawh lo tih sawiin, tun thlenga an tlawhte chu sawrkar kal tawh hna pek, thawh mekte an ni tih a sawi a. MSPMC chuan theihtawpa hma lak chhoh zel an tum tih sawiin, tun dinhmunah chuan Aizawl leh a chhehvela hmasawnna hna thawh an tlawh phawt a. Siaha, Lunglei, Champhai leh hmun hla zawka hna thawhte la tlawh chhunzawm zel an tum tih a sawi bawk.

Sawrkar sum hmanga Project hrang hrang thawh te endika viltu tur MSPMC hi February 21, 2024 khan Mizoram sawrkarin dinin Chairman-ah Chief Minister Lalduhoma a ni a, Vice Chairman-ah RL Rinawma IRS (Rtd) niin Secretary-ah Er. Vanlalruata Sailo ruat an ni a. Anni bakah hian mi thiam pakua leh pawl hrang hrang aiawh mi 12 ruat an ni bawk a. May 24, 2024 khan member dang pahnih an ruat belh leh bawk a. Hei bakah hian Secretary atan hian Er. Lalthanzuala Ralte chu ruat a ni leh tawh bawk a ni.

Chief Minister Lalduhoma chuan December 20, 2023-a Mizoram People’s Forum hruaitute a kawmnaah MSPMC din a nih dawn thu leh he Committee remtihna lo chuan Contract hna thawh hun pawhsei leh ennawn te tih a nih dawn loh thu a sawi a ni.