East Tuipui Bial-ah Pangang puang leh mek

Tunlai hian Champhai District chhim lam, East Tuipui Assembly Bial chhunga khaw engemaw zat a tlangram loneitute chu Pangang puangin a timangang hle.

Agriculture and Farmers' Welfare Department hotute sawi danin Pangang puan tanna hi a la rei lo na-in khaw 10 chuangte thlawhhma a suasam mek a, he Pangang puang hi kum hmasa lama puang thin Vaimim hnah leh kung eichhetu Fall Army Worm kha ni lovin 'Hnah Khawr Pangang' an tih mai, sap tawnga 'Leaf Folder' an tih chi a ni a. Buh hnah-ah beiin Buh hnah a khawr a, Buh hnah leh a kung a tichhe thei a ni. Agriculture Department hotute chuan rannung thahna hlo a theih ang anga sem a nih thu leh a hman dan pawh loneitute zirtir an nih thu an sawi a ni.

Helai Bial-a Leilet neitute chuan buh an phun chhoh mek thu leh pangang puangin a la tihbuai ve loh thu an sawi a. Tlangram loneitute erawhin an buaipui hle thu an sawi a. Pangang puanna khuate hi hriat theih chinah Farkawn, Vaphai, Vangchhia leh a chhehvel khaw engemaw zat a ni a. Chawlhkar khat kalta a Champhai DAO an sawn tak chuan a awm lai khan khaw 6-ah a puang niin a sawi bawk.

Mizoram-ah nakum khian Thingtam thleng tura ngaih a ni a, hetiang chhiatna a lo thlen hma hian Pangang, Thangnang leh Khau puang a awm thin niin an sawi a. Kum 1977 kha Thingtam hnuhnung ber niin khata tanga kum 48-na, nakum khian a thleng leh ngei dawna chhut a ni a, hmun tam takah Rawthing hi a tam tan chho mek ni a sawi a ni bawk.