Keitum khua in Medal latu an khaw nula an hmuak

Serchhip District-a Keitum khua chuan Mizoram tana Weigthlifting Medal pathum latu an khaw nula, Zosangzuali d/o Lalrotlingi, Sikulpui Veng Keitum chu Inrinni khan Keitum-ah ropui takin an lo hmuak.

Zosangzuali hi July 10-14, 2024 chhunga Bhubaneswar (Odisha)-a neih ‘Asmita Khelo India Youth, Junior leh Senior Women League Zone-A’ ah Mizoram aiawha kalin Junior Category-ah Gold Medal a lak bakah Youth leh Senior Level-ah Silver Medal a la bawk a, Inrinni khan Aizawl atanga Keitum khua thlengin Keitum khawtlang hian ropui takin an lo hmuak a ni. Keitum nula Zosangzuali hi Serchhip Kikawn-ah Ser-chhip District Weigthlifting Association hruaitute leh Keitum khawtlang hruaitu ten an lo dawngsawng a, a nawlpui in Dawngzawl-ah lo hmuak lehin lirthei hmangin kawng zawhpui a ni a, hemi hnu hian Keitum kawn-ah amah lawmna hi neih a ni.

Keitum kawn-a hun hman hi Keitum VC Vice President Hrangzuala chuan kaihruaiin Zosangzuali leh a Coach, Malsawma Khiangte te hi ‘Tawlhloh Puan’ leh pangpar thi hlan an ni a, pawl hrang hrang leh mimal thahnem takin thilpek an hlan bawk a ni.

Asmita Khelo India Youth, Junior leh Senior Women’s League Zone A-ah hian Mizoram atanga kal zingah Zosangzuali bakah hian Cindy Lalparmawii chuan Youth Category-ah Silver la in Junior Category-ah Bronze Medal a la bawk a, Zosangzuali leh Cindy-i te hi Khelo India State Centre of Excellence (KISCE), Sports & Youth Services (SYS), Rajiv Gandhi Stadium Hostel-a awm lai niin Coach Malsawma Khiangte, KISCE, SYS hnuaia zirlaite an ni a. Tun tum inelna ah hian rit chawi chak mi pali an tel a ni.

Khelo India hnuaiah hian Zone A hi khaw-chhak lam State 13 - West Bengal, Jharkhand, Bihar, Chhatisgarh, Odisha leh hmarchhak State pariat an awm a. Tun tum inelnaah hian Youth, Junior leh Senior-ah Odisha an Champion vek a ni.