ASF vangin Serchhip District ah Vawk 1490 a thi tawh

Serchhip District chhungah kumin chhungin ASF vangin kumin hian Vawk 1490 zet a thi tawh a, Serchhip-a VC Area hrang hrangah ASF vang hian harsatna a thleng tawh a ni.

Serchhip-a AH & Vety Department chhinchhiahna atanga a lan danin nimin khan Serchhip District-a Veng leh khua 11-ah ASF vanga Vawk thi hi chhin-chhiah leh niin Khawlailung-ah Vawk 11 a thi a, Keitum khua ah Vawk 5 thiin Serchhip Chanmari Veng ah pahnih leh Piler, East Lungdar New Serchhip South leh Serchhip Chhim Veng-ah Vawk pakhat a thi a, a vaiin nimin khan Vawk thi chhinchhiah thar 22 a awm a. Nimin vek khan Veng leh khua 9-ah Vawk suat 92 awm leh bawkin heng zinga 41 te hi Khawlailung khuaa mi an ni a,  Khawlailung-ah hian Vawk thi chhinchhiah 46 zet a awm tawh bawk a ni.

Hetihlai hian Serchhip Kawnpui Area-ah ASF vanga Vawk thi a awm leh tak avangin Serchhip-a VC Area hrang hrangte chuan ASF vang hian harsatna tawkin Serchhip Darnam VC area tihloh ah chuan ASF vanga Vawk thi hi chhin-chhiah tur a awm vek a, VC Area thenkhat chu ASF hri lenna ah puangin Vawk talh te pawh khap a ni tawh nghe nghe a ni.

Heti hian nimin thleng khan Serchhip District chhunga khaw 29-ah chhungkaw 1130 ten ASF vang hian harsatna an tawk tawh a, kumin hian ASF vanga Vawk thi 1490 awm tawhin Vawk 3946 suat a ni tawh bawk a ni.