Police te chawimawina hlan

Mizoram Police chhunga Rank hrang hrang a hna thawk tha mi 59 te hnenah Mizoram DGP chuan nimin khan Ati Utkrisht Seva Padak leh Utkrisht Seva Padak chawimawina tangkapui a hlan a, Serchhip District atang pawhin he chawimawina dawng hi an awm a ni.
Mizoram-a a vawi khatna atana Ati Utkrisht Seva Padak leh Utkrisht Seva Padak chawimawina semna hun hi Arya Mess, PHQ, Aizawl-ah neih niin kum 2020 atanga 2022 chhunga hnathawk tha te hnenah hlan an ni a. Ati Utkrisht Seva Padak leh Utkrisht Seva Padak chawimawinate hi Central Armed Police Forces, State/UT Police Forces, Central Police Organizations, Assam Rifles, National Security Guards, sawrkar laipui, State leh UT hnuaia Intelligence Organizations, Home Guards leh India ramchhunga Armed Police Force hrang hrang hnuaia a ngheta kum 15 (Utkrisht Seva Padak) leh kum 25 (Ati Utkrisht Seva Padak) thawk tawh, an hnathawhnaa inpekna, thiamna leh huaisenna kawnga a phute hnena Ministry of Home Affairs, Govt. of India in a hlan thin a ni.

Ati Utkrisht Seva Padak hi kum 2020 khan mi 4 hnenah hlan niin Utkrisht Seva Padak hi kum 2020-ah mi pahnih hnenah hlan an ni a. Ati Utkrisht Seva Padak hi kum 2022-ah mi 26 ten dawngin an zingah hian Serchhip District Executive Force atangin H/C Lalfakawma, H/C K.Chhandamthanga leh Hony. H/C K. Lalnghak-liana te an tel bakah PTS Thenzawl atangin Hav. Lalnunthara, Hav. Pramod Kumar Singh leh Hav. T.Lalsangzuala te an tel a. Utkrisht Seva Padak hi kum 2022-ah mi 27 ten dawngin an zingah hian Serchhip DEF atangin H/C F. Lalchhuankima leh PTS Thenzawl atangin Hav. H.Lalrinmawia te an tel bawk a. Mizoram Police chuan heng chawimawina dawngtu zawngzawngte an hnaa an inpekna, thawhrimna leh taimakna avangin a chhuangin a lawmpui takzet tih an sawi a ni.