Mualkhang Bottling Plant atan sanction order hlan

Mualkhang Bottling Plant din thar lehna tur atana sanction order chu nimin July 22, 2024 khan Indian Oil Corporation Ltd. (IOCL) Dy. General Manager Z. Lumding chuan Supply Minister B Lalchhanzova hnenah a hlan.

Thudawn danin, kum 2006-a bul tan tawh Mualkhang Bottling Plant hi Oil Industry Safety Directorate Guideline tehna atanga a tlin tawk lohna te hmuh a nih avangin January, 2020 atang khan tihtawp a ni a. Mizoram Sawrkar leh IOCL-te tangkawp in a hma aia lian zawka thar thawh tura hma an lakna kal zelah Mualkhang Bottling Plant hlui hi thiah a, OISD 144 design mila a thar sak thatna tur cheng vbc. 225.71 chu IOCL chuan July 4, 2024 khan a rawn sanction fel a, sanctioned order hi Supply Minister kutah an rawn hlan ta a ni.

Mualkhang Bottling Plant hi zawhfel a nih hunah chuan 30 Thousand metric ton per annum (30 TMTPA), ni khata Gas Cylinder bur 7000 vel pe chhuak thei tura duan a ni a. A hmunah hian 900 MT (cylinder 63300) vel chhekkhawl theihna a awm nghal dawn a. Khuarel chhiatna leh chhan hrang hrang vanga inkalpawhna buai thulhah pawh ni kua atanga ni sawm chhung mamawh dahkhawl theihna hmun tur a ni.

IOCL hotute chuan Chief Minister Lalduhoma leh Supply Minister B. Lalchhanzova ten theihtawpa hma an lakpuina rah a nih thu sawiin, “Chief Minister-in IOCL Chairman hnenah Mualkhang Bottling Plant sak that a nih theih nana biak ngaite a biak bakah Supply Minister B. Lalchhanzova, Revenue Minister ni bawkin ram mamawh atan Land Lease renew leh ram mamawh belh atan Land Lease extension rang taka a tih avang te, hna tan vat a nih theih nana Compensatory Afforestation tur ram rang taka a hmuhsak avangin hnathawhna tur sum pawh hi rang taka sanction a ni,” a ti.