Stop Diarrhoea Campaign kalpui mek a ni

Kawthalo titawp tura inzirtirna, Stop Diarrhoea Campaign kalpui mekah naupang kum 5 hnuailam awmna In tinah ORS leh Zinc damdawi sem a ni.

He thu hi Health & Family Welfare Department-a Joint Director, Dr. Lily Chhakchhuak chuan sawiin, tun thla (July) ni 1, 2024 atanga hman tan, Stop Diarrhoea Campaign hi August ni 30, 2024 thleng kalpui tur a ni a. Kum hmasa lama chawlhkar hnih chhung Diarrhoea Fortnight hman thin chu naupang, kawthalo vanga thi an awm tam thin avangin kuminah chuan thla 2 chhung hman a ni dawn tih a sawi a ni.

Dr. Lily Chhakchhuak chuan kumi nah Mizoram-ah kawthalo vanga thi an la awm lo tih pawh sawiin, nikum-ah mi pakhat thi an awm tih a sawi a, kuminah thi awm lo tura beihpüi thlak an tum thu a sawi bawk a ni.

Stop Diarrhoea Campaign hi thla hnih chhung neih tur a ni a. Hemi chhung hian ASHA ten an bial chhunga In tin tlawhin naupang kum 5 hnuailam te tan ORS leh Zinc tablet an sem dawn a. District Hospital, PHC, CHC leh Sub-Centre ah te ORS leh Zinc mamawh tan lak theihna hmun siam a ni dawn a. School-ah te kut silfai a pawimawhna inzirtir a ni bawk ang.