‘Tourism for All’ tih thupui-ah hmangin ‘Tourism Awareness Week 2024’ hman mek a ni

Thla thar August 3, 2024 thleng awh tur ‘Tourism Awareness Week 2024’ chu Inrinni khan hman tan a ni a, he Hapta hman chhung hian ‘Tourism for All’ tih thupuiah hmangin Tourism chungchang inzirtirna te, khaw thlan bik te tan intihsiakna leh Talk Show te neiin hun hman a ni ang.

‘Tourism Awareness Week 2024’ hawnna hun hi Inrinni khan Aizawl-a Millenium Centre Tual-ah neih niin he hun hmanpuitu Tourism Minister Lalrinpuii chuan Mizoram chhunga tourism tihmasawn tur chuan a chhunga cheng mipuite kan pawimawh thu a sawi a. Tourism hmasawn theihna (potential) tam tak a la awm thu te, tourism chungchanga kan rilru puthmang leh kan dawnsawn danah pawh hma kan sawn tlan a pawimawh a tih thu te a sawi a ni. Tourism Minister chuan India ram chu kawvela mihring tamna ber a nih thu leh hemi avang hian tourism kan ngaihtuah hian ram pawn ami kher beisei lovin, ram chhung mi atang ringawt pawhin tourist thahnem tak Mizoramin a hmuh theih thu a sawi a, “Keimahni ngei pawh hi tourist kan nih chang a awm thei a, tourist tha nih kan tum tur a ni,” a ti bawk.

Minister chuan Sawrkar Department lam atanga hmalakna hrang hrang tarlang bawkin, Lengpui Airport a khualchhawn (greeter) dah an nih thu te, website leh smartphone kaltlanga Online a booking leh payment kalpui mek tihchangtlun te, training hrang hrang pek leh a dangte a tarlang bawk a ni.

Tourism Awareness Week hawnna inkhawm hi Tourism Officer C. Ramsangzuali chuan kaihruaiin Tourism changtu Secretary Dr. Lalrozama chuan kan khualzinte kan duat chuan Mizoram nawm zia zau zawkin min puan darh sak zel dawn tih sawiin, Tourism tihmasawn turin sawrkar leh Department in theihtawp a chhuah thu a sawi a. Tourism Department Director R. Lalrodingi pawhin Mizote chu mikhual hnar ngailo hnam tia hriat kan ni thin tih sawiin, Chutah chuan duhtawk mai lovin, mikhualte chunga that chhuah hnam kan nih tel a pawimawh thu a sawi bawk a ni.

‘Tourism Awareness Week 2024’ hman chhung hian Local Cable TV hrang hrangah te Talkshow neih a ni ang a. Rural Tourism Workshop buatsaihin Tourism Village Competition te neih a ni bawk anga. He intihsiaknaah hian khaw thlan bik pariat – Sailam, Biate, Sairang, Sangau, Aibawk, Baktawng, Buangpui leh Ralvawng an awm a ni. Heng bakah hian Mizoram pumpuiah tourism chungchanga mipuite hriat tur pawimawh inziahna Pamphlet sem a ni dawn bawk a. Zingkawng khaw kar leh Tourism hmun hrang hrangah Hoarding tar tum a ni bawk.