Kal dan ngai-a kal turin ti

Lai Autonomous District Council (LADC)-a ZPM MDC pahnih te MDC an nihna hlihsak an nih lohna chhan tur sawifiah tura LADC Chairman-in a hriattir chu High Court-in kaldan pangngaia kal turin thutlukna a siam.

LADC-a MDC pakua te chu June 20, 2024 khan ZPM party-ah lawmluh an ni a; an zinga pahnih te hi Independent MDC niin heng Independent MDC pahnih - LR. Dingliana Chinzah leh N. Zangura te chu LADC Chairman VL. Hmuaka chuan tun thla ni 12 khan LADC Dan dinglai angin, Political Party an zawm vanga MDC an nihna hlihsak an nihlohna chhan tur sawifiah tura hriattirna pein tun thla ni 18 thleng khan insawi-fiahna hun a pe a, MDC pahnihte hian hun bitiam chhung hian an chhang a ni.

Lawngtlai AOC Veng bialtu MDC LR. Dingliana Chinzah chuan, insawifiah tura hriattirna an hmuh hnuah High Court-ah an zualko tih sawiin, Gauhati High Court, Aizawl Bench chuan an zualkona chu ngaihtuah nghalin MDC an nihna hlihsak leh hlihsak loh chungchangah LADC chu hma la lova, an awmdan pangngaia awm turin a ti niin a sawi.

Hemi hma lam hian MNF MDC K. Hre Kung chuan ZPM a lo zawm tawh a. Hemi thu ah pawh hian Gauhati High Court Aizawl Bench chuan tuna Independent MDC pahnihte chungchanga thu a tih tluk ang tho hian thu a lo titlu tawh bawk a ni.