Parliament-ah Kuva leh Sawhthing lakluh tihtawp a phut thu Rajya Sabha MP in a sawi

Parliament thutkhawm neih mekah Mizoram Rajya Sabha MP K. Vanlalvena chuan rampawn atanga Kuhva leh Sawhthing lakluh tihtawp a phut thu a sawi.

Parliament thutkhawm neih mekah hian nimin khan Rajya Sabha-a Zero Hour-ah thu sawiin K. Vanlalvena chuan North East-a kuthnathawktu ten an thlai thar Kuhva leh Sawhthing hralhna ah harsatna an tawh thu sawiin, he harsatna an tawh chhan chu thenawm ram dangte atanga heng thlaite hi India rama lakluh vang a nih thu a sawi a. North East mipui tam takte ei leh bar a an inghahna chu Kuhva leh Sawhthing a nih thu sawiin, Myanmar atanga dan lova kuhva ro tam tak Mizoram leh Manipur kaltlanga lakluh a nih thu a sawi a. India ram leh Myanmar ramri-ah India sawrkarin Custom leh Assam Rifles te a duty tir chungin ramri kaltlangin Smuggler ten Kuhva ro tam tak an la lut tih sawiin, North East mipui tam tak rindan chuan heng smuggler te leh sawrkar mi rawihte hi tangrualin heng sawrkar phalloh kuhva ro tam tak hi ramri kan in an la lut nia an rin thu a sawi bawk a ni.

Hei mai bakah hian Central sawrkar chuan China atangin Sawhthing tam tak a chawlut tih Rajya Sabha MP K. Vanlalvena chuan sawiin, tul lo taka heng Sawhthing leh Kuhva foreign ram atanga lakluh hian North East-a kut hnathawktu te eizawnna a tihchhiat avangin Sawhthing leh Kuhva lakluh hi tihtawp thuai a phut thu a sawi a ni.